Read Shona Union Version 2002 Jobho 32 Bible Online

Jobho 32 - Shona Union Version 2002 bible

Jobho 32

¹Zvino varume ava vatatu vakarega kupindura Jobho, nokuti akati ndakarurama hangu.

²Ipapo Erihu mwanakomana waBharakeri muBhuzi, weimba yaRami, akatsamwa kwazvo; akatsamwira Jobho kwazvo, nokuti akanga azviruramisa kupfuura Mwari.

³Akatsamwirawo kwazvo shamwari dzake nhatu, nokuti vakanga vashaiwa mhinduro, kunyange zvakadaro vakanga vapa havo Jobho mhosva.

⁴Zvino Erihu akanga amirira kutaura naJobho, nokuti ivo vaiva vakuru kwaari pazero.

⁵Zvino Erihu akati achiona kuti hapene mhinduro pamiromo yavanhu ava vatatu, iye akatsamwa kwazvo.

⁶Zvino Erihu mwanakomana waBharakeri muBhuzi wakapindura, akati, “Ini ndiri muduku, asi imi mava vakuru kwazvo; Saka ndakazvidzora hangu, ndikatya kukuzivisai kufunga kwangu.

⁷Ndakati, ‘Vana mazuva mazhinji ngavataure havo, Vana makore mazhinji ngavadzidzise vamwe uchenjeri.’

⁸Asi mweya uripo pamunhu, Kufuridzira kwowaMasimbaose kunovapa kunzwisisa.

⁹Havazi vakuru vakachenjera, Kana vatana vanonzwisisa kururamisira.

¹⁰Saka ndakati, ‘Chindinzwai; Neniwo ndichakuzivisai kufunga kwangu.’

¹¹Tarirai, ndakambomirira mashoko enyu, Ndakaterera kuti ndinzwe nharo dzenyu, Nguva yamakatsvaka zvamungataura.

¹²Zvirokwazvo, ndakakucherekedzai, Asi tarirai, hakuna munhu akapwisa Jobho. Kana akapindura mashoko ake pakati penyu.

¹³Chenjerai, murege kuti, ‘Takawana huchenjeri; Mwari ndiye angamukunda, asi munhu kwete;’

¹⁴Nokuti haana kutaura mashoko ake kwandiri; Neni handingamupinduri iye nokutaura kwenyu.

¹⁵Vashamiswa, havachapinduri; Havachine shoko ravangataura.

¹⁶Ko ini ndingamirira, zvavasingatauri ivo, Zvavanoramba vamire, vasina chavangapindura here?

¹⁷Neniwo ndichapindura padzoro rangu, Neniwo ndichazivisa kufunga kwangu.

¹⁸Nokuti ndizere namashoko; Mweya, uri mukati mangu, unondimanikidza.

¹⁹Tarirai, mukati mangu makafanana newaini isina pokubuda napo; Zvakafanana nehombodo itsva dzinokaroparuka.

²⁰Ndichataura, kuti ndiremudzwe, Ndichashamisa miromo yangu ndipindure.

²¹Ndirege hangu kutsaura munhu upi noupi; Uye handingatumidzi ani nani mazita anobata kumeso.

²²Nokuti handizivi kutumidza mazita anobata kumeso; Zvimwe Muiti wangu angakurumidza kundibvisa.”