Read Shona Union Version 2002 Jobho 33 Bible Online

Jobho 33 - Shona Union Version 2002 bible

Jobho 33

¹Asi Jobho, chidonzwai henyu kutaura kwangu, Teererai mashoko angu ose.

²Tarirai zvino, ndashamisa muromo wangu, Rurimi rwangu rwataura mumuromo wangu,

³Mashoko angu achadudzira kururama kwomwoyo wangu; Miromo yangu ichataura izvo zvainoziva nezvokwadi.

⁴Mweya waMwari wakandiita, Kufuridzira kwowaMasimbaose kunondipa upenyu.

⁵Kana mukagona, chindipindurai henyu; Gadzirai mashoko enyu pamberi pangu, simukai henyu.

⁶Rairai, ini ndakafanana nemi pamberi paMwari; Neniwo ndakahumbwa nevhu.

⁷Tarirai, kutyisa kwangu hakungakutyisiyi imi, Uye handingakuremedziyi.

⁸Zvirokwazvo, makataura ini ndichizvinzwa, Ndakanzwa izwi ramashoko enyu, richiti,

⁹“Ndakanaka, handina kudarika; Handine mhosva, hapana zvakaipa mukati mangu;

¹⁰Tarirai, iye unowana mhosva kuti arwe neni, Anonditi muvengi wake.

¹¹Anomana makumbo angu mumatanda, Anocherekedza nzira dzangu dzose.”

¹²Tarirai, ndichakupindurai, pachinhu ichi hamuna kururama, Nokuti Mwari mukuru kupfuura munhu.

¹³Munorwireiko naye? Nokuti haazvidaviriri pamashoko ake ose.

¹⁴Nokuti Mwari anotaura kamwechete, Kana kaviri, asi munhu haane hanya nazvo.

¹⁵Pakurota, kana pane zvinoonekwa usiku, Kana munhu abatwa nehope kwazvo, Kana avete panhoo;

¹⁶Ipapo unodziura nzeve dzavanhu, Nokusimbisa kurairwa kwavo,

¹⁷Kuti adzore munhu pakuvavarira zvakaipa, Nokuvanzira munhu kuzvikudza;

¹⁸Kuti adzore mweya wake pagomba. Hupenyu hwake hurege kuparadzwa nomunondo.

¹⁹Unorangwawo achirwadziwa panhoo yake, Nokutambudzika nguva dzose mumapfupa ake;

²⁰Naizvozvo hupenyu hwake hunosema zvokudya, Nomwoyo wake zvokudya zvinonaka.

²¹Nyama yake inopedzwa, haichaonekwi, Mapfupa ake, akanga asingaonekwi, anobudira kunze.

²²Zvirokwazvo mweya wake unoswedera kugomba, Nohupenyu hwake kuvaparadzi.

²³Kana mutumwa akasvika kwaari, Ari mushanduri, mumwe pakati pavane zviuru zvamazana, Kuti aratidze munhu nzira yakarurama;

²⁴Mwari akamunzwira tsitsi, akati, “Murwirei arege kuburukira kugomba, Ndawana dzikinuro.”

²⁵Nyama yake ichava itsva kupfuura yomwana; Achadzokera kumazuva ouduku hwake.

²⁶Anonyengetera kuna Mwari, iye achimufarira; Naizvozvo anotarira chiso chake nomufaro; Akadzosera munhu kururama kwake.

²⁷Uchaimba pamberi pavanhu, achiti, “Ndatadza, ndakanganisa zvakarurama, Asi hazvina kundibatsira;

²⁸Iye akarwira mweya wangu urege kuburukira kugomba, Hupenyu hwangu huchaona chiedza.”

²⁹Tarirai, Mwari unoita zvinhu izvi zvose, Kaviri kana katatu nomunhu,

³⁰Kuti adzose mweya wake pagomba, Kuti avhenekerwe nechiedza chavapenyu.

³¹Cherekedzai zvakanaka, Jobho, mundinzwei; Nyararai, ini nditaure.

³²Kana mune shoko rokureva, ndipindurei; Taurai, nokuti ndinoda kukururamisirai.

³³Kana musingadi, nditeererei; Nyararai, ini ndikudzidzisei huchenjeri.