Read Shona Union Version 2002 Jobho 34 Bible Online

Jobho 34 - Shona Union Version 2002 bible

Jobho 34

¹Ipapo Erihu akapindura, akati,

²“Inzwai mashoko angu, imi vanhu vakachenjera; Rerekai nzeve dzenyu kwandiri, imi mune zivo.

³Nokuti nzeve ndiyo inoidza mashoko, Sezvinoravira mukanwa zvokudya.

⁴Ngatizvitsanangurire zvakarurama; Ngatizive tose kuti zvakanaka ndezvipi.

⁵Nokuti Jobho akati, ‘Ndakarurama, Asi Mwari akanditorera kururama kwangu;

⁶Kunyange ndakarurama hangu, ndinonzi ndine nhema; Pandakakuvadzwa hapangapori, kunyange ndisina kudarika.’

⁷Ndianiko akafanana naJobho, Anonwa kushorwa semvura?

⁸Anofambidzana navanoita zvakaipa, Anofamba navanhu vakashata.

⁹Nokuti iye akati, ‘Munhu haatongobatsirwi, Kana achifarira Mwari.’

¹⁰Saka chindinzwai, imi varume venjere, Mwari haangatongoiti zvisakarurama; waMasimbaose haangatongoiti zvakaipa.

¹¹Nokuti acharipira munhu sezvaakabata, Achapa mumwe nomumwe sezvaakafanirwa.

¹²Zvirokwazvo, Mwari haangaiti zvakaipa, waMasimbaose haangakanganisi pakutonga.

¹³Ndianiko akamuita murairi wenyika? Ndianiko akamupa nyika yose?

¹⁴Kana akadzosera mwoyo wake kwaari, Kana akadzosera kwaari mweya wake nokufema kwake;

¹⁵Ipapo vanhu vose vachaparara pamwechete, Munhu akadzokerazve kuguruva.

¹⁶Zvino kana mukagona kunzwisisa, inzwai shoko iri, Teererai izwi ramashoko angu.

¹⁷Ko munhu, anovenga zvakarurama, angabata ushe here? Mungapa mhosva munhu akarurama, ane simba here?

¹⁸Ko zvakanaka kuti kuna mambo, ‘Makashata?’ Kana kuvakuru, ‘Muri vakaipa here?’

¹⁹Ndoda kumunhu asingakudzi machinda, Asingatsauri vapfumi kupfuura varombo. Nokuti ivo vose ndiro basa ramaoko ake.

²⁰Vanofa kamwe-kamwe pakati pousiku; Vanhu vanozozununguswa ndokuparara havo, Vane simba vanobviswa zvingaitwi noruoko.

²¹Nokuti meso ake anotarira nzira dzomunhu, Unoona kufamba kwake kwose.

²²Hapana rima kana mumvuri worufu, Pangavanda vanoita zvakaipa.

²³Nokuti haachafaniri kurangarira munhu, Kuti atongwe pamberi paMwari.

²⁴Anoparadza vanhu vane simba asinganzveri, Ndokugadza vamwe panzvimbo yavo.

²⁵Saka anocherekedza mabasa avo; Unovaparadza usiku, vakapwanyiwa.

²⁶Anovarova sezvinorohwa vanhu vakaipa Vamwe vose vachizviona pachena;

²⁷Nokuti vakatsauka pakumutevera, Vakasava nehanya nenzira dzake dzose;

²⁸Naizvozvo vakasvitsa kuchema kwavarombo kwaari, Akanzwa kuchema kwavakatambudzwa.

²⁹Kana iye akazorodza, ndianiko ungapa mhosva? Kana akavanza chiso chake, ndianiko angazomuona? Kana zvichiitirwa rudzi kana munhu mumwe, zvakafanana hazvo;

³⁰Kuti munhu asakarurama arege kubata ushe, Kuti kurege kuva nomunhu achateya vanhu.

³¹Nokuti kunomunhu here akati kuna Mwari, ‘Ndarangwa hangu, kunyange ndisina kutadza?

³²Ndidzidzisei zvandisingaoni; Kana ndichinge ndaita zvakaipa, handingazviitizve?’

³³Ko iye achatsiva sezvaunoda iwe, zvaunozviramba here? Nokuti ndiwe unofanira kutsanangura, handizini; Saka chitaura zvaunoziva.

³⁴Vanhu vane njere vachati kwandiri, Uye vose vakachenjera, vanondinzwa, vachati,

³⁵‘Jobho anotaura zvaasingazivi, Mashoko ake haano uchenjeri.

³⁶Dai Jobho aiidzwa kusvikira pakupedzisira, Zvaakapindura savanhu vakaipa.

³⁷Nokuti anowedzera kumukira Mwari pazvivi zvake, Anorovanya maoko ake pakati pedu, Achiwanza mashoko ake anorwa naMwari.’ ”