Read Shona Union Version 2002 Jobho 35 Bible Online

Jobho 35 - Shona Union Version 2002 bible

Jobho 35

¹Zvino Erihu akapindurawo, akati,

²“Munoti ndiko kururama kwenyu here. Munoti, kururama kwangu kunopfuura kwaMwari?

³Zvamunoti, ‘Muchabatsirweiko nazvo?’ Ndichawaneiko, zvingapfuura zvandingawana kana ndatadza hangu?

⁴Ndichakupindurai, Pamwechete neshamwari dzenyu.

⁵Tarirai kudenga-denga, muone; Tarirai makore okudenga akakwirira kupfuura imi.

⁶Kana muchinge matadza, ko mungamuitei iye? Kana kudarika kwenyu kuchinge kwakawanda, ko mungamuitei?

⁷Kana makarurama, mungamupeiko? Kana iye uchapiweiko paruoko rwenyu?

⁸Kuipa kwenyu kungatadzira munhu akaita semi, Kururama kwenyu kungabatsira mwanakomana womunhu.

⁹Vanhu vanoridza mhere nokuda kwokumanikidza kwakawanda; Vanoridza mhere kuti varwirwe paruoko rwoane simba.

¹⁰Asi hapana anoti, ‘Mwari Muiti wangu aripiko?’ Iye anotiimbisa usiku;

¹¹Iye anotidzidzisa kupfuura shiri dzokudenga? Anotiita vakachenjera kupfuura shiri dzokudenga?

¹²Ipapo vanochema, asi hapana anopindura, Nokuda kwokuzvikudza kwavanhu vakaipa.

¹³Zvirokwazvo Mwari haanganzwi zvisina maturo, waMasimbaose haangavi nehanya nazvo.

¹⁴Ndoda kana muchiti, handimuoni; Mhosva iri pamberi pake, chimumirirai henyu!

¹⁵Asi zvino, zvaasina kutsiva pakutsamwa kwake, Kana kusava nehanya zvikuru nokuzvikudza;

¹⁶Naizvozvo Jobho woshamisa muromo wake achireva zvisina maturo; Wowanza mashoko asingazivi.”