Read Shona Union Version 2002 Jobho 36 Bible Online

Jobho 36 - Shona Union Version 2002 bible

Jobho 36

¹Erihu akapfuurawo, akati,

²“Nditenderei henyu zvishoma, ndikuratidzei; Nokuti ndichine zvimwe zvandinoda kutaura pamusoro paMwari.

³Ndichatora zivo yangu kure, Ndicharatidza kuti Muiti wangu akarurama.

⁴Nokuti zvirokwazvo, mashoko angu haane nhema; Mumwe akakwana pazivo unemi.

⁵Tarirai, Mwari ane simba, asi haashori munhu; Imhare pasimba renjere.

⁶Haachengeti upenyu hwavakaipa; Asi anoruramisira vanotambudzika.

⁷Haaregi kutarira vakarurama nameso ake; Asi anovagarisa pachigaro choushe pamwechete namadzimambo, Anovagarisa nokusingaperi, vachikudzwa.

⁸Asi kana vachinge vasungwa namaketani, Kana kubatwa namabote okutambudzika;

⁹Ipapo unovazivisa mabasa avo, Nokudarika kwavo, kuti vakafamba vachizvikudza.

¹⁰Unodziurawo nzeve dzavo vanzwe kuraira kwake, Unovaraira kuti vadzoke pazvakaipa zvavo.

¹¹Kana vakamunzwa nokumushumira, Vachapedzisa mazuva avo vachifara, Namakore avo vari pane zvinofadza.

¹²Asi kana vakaramba kuteerera, vachapera nomunondo, Vachafa vasina zivo.

¹³Asi vasingadi Mwari pamwoyo vanozviunganidzira kutsamwa; Havaridzi mhere kuti vabatsirwe kana achivasunga.

¹⁴Vanofa vachiri vaduku, Hupenyu hwavo hunopera sohwavasina kururama.

¹⁵Anorwira anotambudzika pakutambudzika kwake, Unodziura nzeve dzavo pakumanikidzwa kwavo.

¹⁶Zvirokwazvo, akanga achida kukubvisai panjodzi Kukusvitsai panzvimbo yakafara, pasina kumanikana; Kuti zvinoiswa patafura yenyu zvive zvizere namafuta.

¹⁷Asi imi muzere nokutonga vakaipa; Kutonga nokururamisira zvinokubatai.

¹⁸Nokuti chenjerai kuti kutsamwa kurege kukusvitsai pakudadira; Hukuru hwedzikinuro hurege kukutsausai.

¹⁹Ko pfuma yenyu ingaringana, kuti murege kutambudzika here, Uye simba renyu rose-rose here?

²⁰Musashuva husiku, Panguva iyo ndudzi dzavanhu dzinobviswa panzvimbo yadzo.

²¹Chenjerai, regai kurangarira zvakaipa; Nokuti ndizvo zvamakasanangura kupfuura kutambudzika.

²²Tarirai, Mwari anoita zvinhu zvikuru nesimba rake; Ndianiko mudzidzisi wakafanana naye?

²³Ndianiko akamuraira nzira yake? Kana ndianiko angati, ‘Makaita zvisina kururama here?’

²⁴Rangarirai, kuti murumbidze basa rake, Rakaimbwa navanhu.

²⁵Vanhu vose vakaritarira; Vanhu vanoriona vari kure.

²⁶Tarirai, Mwari mukuru; asi isu hatimuzivi; Kuwanda kwamakore ake hakunganzverwi.

²⁷Nokuti anokwevera kumusoro madonhedza emvura, Anoshanduka mvura inonaya ichibva pamwando wawo;

²⁸Inodururwa namakore Ichidonhera yawanda pamusoro pavanhu.

²⁹Ko kuno munhu anganzwisisa kudadanurwa kwamakore, Nokutinhira kwetende rake here?

³⁰Tarirai, unodadanura chiedza chake kunhivi dzake dzose; Unofukidza pasi pegungwa.

³¹Nokuti naizvozvi anotonga ndudzi dzavanhu; Anovapa zvokudya zvizhinji.

³²Anofukidza maoko ake nemheni; Nokuiraira kuti irove payakaratidzwa.

³³Mubvumo wayo unomuzivisa, Nemombewo dzinonzwa kuti unouya.”