Read Shona Union Version 2002 Jobho 37 Bible Online

Jobho 37 - Shona Union Version 2002 bible

Jobho 37

¹Zvirokwazvo mwoyo wangu unobvunduswawo pamusoro paizvozvi, Uchibviswa panzvimbo yawo.

²Tererai kutinhira kwezwi rake, Nokuwunga kunobva pamuromo wake.

³Anokutuma pasi pedenga rose, Nemheni yake kusvikira pamagumisiro enyika.

⁴Inoteverwa nezwi rinodzvova, Anotinhira nezwi roumambo hwake. Haazvidzivisi kana izwi rake richinzwika.

⁵Mwari anotinhira nezwi rake rinoshamisa; Anoita zvinhu zvikuru zvatisingagoni kunzwisisa.

⁶Nokuti anoti kuchando, “Chiwira panyika;” Saizvozvowo kumvura inopfunha-pfunha, Uyewo kumvura inoturuka nesimba.

⁷Anodzivisa ruoko rwomunhu mumwe nomumwe, Kuti vanhu vose vaakaita vamuzive.

⁸Panguva iyo zvikara zvinondovanda, Zvichirambira mumapako azvo.

⁹Dutu remhepo rinobuda pakamuri rezasi; Nechando kurutivi rwokumusoro.

¹⁰Mazaya echando anopiwa vanhu nomweya waMwari; Uye mvura mhami inogwamba.

¹¹Anozadza makore matema nomwando, Anodadanura gore rine mheni yake.

¹²Rinotendeudzwa nokufambisa kwake, Kuti zviite zvose zvaanozviraira Panyika inogarwa navanhu;

¹³Anoituma kuti zvimwe ive shamhu, zvimwe ifadze nyika yake, zvimwe iratidze tsitsi yake.

¹⁴Teererai shoko iri, nhasi Jobho; Chimbomirai murangarire mabasa anoshamisa aMwari.

¹⁵Ko munoziva marairirwo azvo naMwari here, Nokupenyiswa kwemheni yegore rake here?

¹⁶Munoziva maturikirwo amakore here, Namabasa anoshamisa aiye akwana pazivo here?

¹⁷Munonzwisisa madziyiro enguo dzenyu, Kana nyika yakagadzikana nemhepo inobva zasi here?

¹⁸Ko mungagona kudadanura denga pamwechete naye, Iro rakasimba sechioni-oni chakaumbwa here?

¹⁹Tidzidzisei zvatingareva kwaari; Nokuti hatigoni kunyatsoreva nemhaka yerima.

²⁰Ko iye anofanira kuudzwa kuti ndinoda kutaura here? Kana ndianiko munhu anoda kumedzwa?

²¹Zvino vanhu havagoni kutarira chiedza chinopenya kudenga; Asi mhepo ichapfuura, ndokurinatsa.

²²Kunaka sokwendarama kunobva kurutivi rwokumusoro; Mwari ano humambo hunotyisa kwazvo.

²³Kana ari waMasimbaose, hatigoni kumunzwisisa; ane simba guru-guru; Haangatambudzi pakutonga nokururama kukuru.

²⁴Saka vanhu vanomutya; Haane hanya navane mwoyo yakachenjera.