Read Shona Union Version 2002 Jobho 38 Bible Online

Jobho 38 - Shona Union Version 2002 bible

Jobho 38

¹Ipapo Jehovha akapindura Jobho, ari pachamupupuri, akati,

²“Ndianiko uya anodzima zano rangu achiriita rima Namashoko asine zivo here?

³Chizvisunga chiuno chako zvino somurume; Nokuti ndichakubvunzisisa, iwe undidudzire.

⁴Iwe wakanga uripiko panguva yandakateya nheyo dzenyika? Chidudzira, kana une zivo iwe.

⁵Ndianiko akatara kukura kwayo, kana uchizviziva? Kana ndianiko akaiyera norwonzi?

⁶Ko nheyo dzayo dzakateyiwa pamusoro pei? Kana ndianiko akateya ibwe rayo rekona?

⁷Panguva yakaimba nyeredzi dzamambakwedza pamawa, Uye vanakomana vose vaMwari vachipururudza nomufaro?

⁸Kana ndianiko wakadzivira gungwa nemikova, Panguva yokudzutuka kwaro, richibuda pachizvaro;

⁹Panguva yandaita gore nguo yaro, Uye rima guru uve mucheka wokuriputira nawo;

¹⁰Panguva yandakaritarira muganho waro, Ndikariisira mazariro nemikova,

¹¹Ndikati, ‘Ungasvikira pano, asi haungapfuvuri; Mafungu ako, anozvikudza, achadzivirirwa pano?’

¹²Iwe wakatongoraira mangwanani kubva pakutanga kwamazuva ako here, Ukaratidza mambakwedza nzvimbo yawo here?

¹³Kuti abate migumo yenyika, Vakaipa vazuzwe vabve pairi here?

¹⁴Zvinoshanduka sevhu kana richitsikwa nechisimbiso, Zvinhu zvose zvichionekwa sapanguo.

¹⁵Vakaipa vanodzitirirwa chiedza chavo, Ruoko, runozvikudza, runovhuniwa.

¹⁶Iwe wakatongopinda pamatsime egungwa here? Kana wakatongofamba pakadzikadzika pasi here?

¹⁷Masuo orufu akatongokuzarurirwa here? Kana wakatongoona masuo omumvuri worufu here?

¹⁸Wakatongonzwisisa upamhi hwenyika here? Dudzira, kana uchizviziva zvose.

¹⁹Nzira iripiko inoenda kunogara chiedza, Kana riri rima, nzvimbo yaro iripiko?

²⁰Kuti undozviisa kumiganho yazvo, Uye kuti uzive nzira dzinoenda kumusha wazvo here?

²¹Unenge unoziva hako, nokuti wakanga wakazvarwa panguva iyo! Mazuva ako anenge akawanda kwazvo!

²²Wakatongopinda panovigwa pfuma yamazaya echando here, Kana wakatongoona panovigwa pfuma yechimvuramabwe here?

²³Izvo zvandakachengetera nguva yenhamo, Nezuva rokurwa nehondo here?

²⁴Chiedza chinoparadzaniswa nomutoo upiko, Uye mhepo inobva mabvazuva inopararira seiko panyika?

²⁵Ndianiko akacherera boporodzi remvura mugero, Kana kuratidzira mheni yomutinhiro nzira yayo;

²⁶Kuti mvura iniswe panyika isina vanhu, Parenje pasina vanhu;

²⁷Kuti ivhu rakasiyiwa nerakaparadzwa rigutswe; Uye bumhudza rimereswe here?

²⁸Ko mvura inonaya inababa here? Kana ndianiko wakazvara madonhedza edova?

²⁹Mazaya echando akabuda muchizvaro chaaniko? Uye chando chokudenga ndianiko akachibereka?

³⁰Mvura inogwamba sebwe, Gungwa rakadzika rinogwamba pamusoro paro.

³¹Ko iwe ungasunga sumbu reChinyamutanhatu, Kana kusunungura zvisungo zveOrionhi here?

³²Iwe ungabudisa Mazaroti panguva yawo here? Kana ungagona kufambisa Arikituro navanakomana vayo here?

³³Iwe unoziva mitemo yokudenga here? Iwe ungagona kuraira ushe hwazvo panyika here?

³⁴Ko iwe ungasvitsa inzwi kumakore, Kuti ufukidzwe nemvura yakawanda here?

³⁵Iwe ungagona kutuma mheni, kuti dzifambe, Dzichiti kwauri, ‘Tiri pano,’ here?

³⁶Ndianiko akaisa uchenjeri mukati mamakore matema? Kana ndianiko akapa nyeredzi njere?

³⁷Ndianiko angagona kuverenga makore nohuchenjeri hwake here? Kana ndianiko angagona kudurura hombodo dzemvura dzokudenga?

³⁸Kana guruva richiungana pamwechete, Namavhinga achinamatirana here?

³⁹Ko iwe ungavhimira shumbakadzi, Kana kugutsa vana veshumba here?

⁴⁰Kana idzo dzichitsiyama panzvimbo dzadzo, Nokurambira pakavanda dzichivandira here?

⁴¹Ndianiko anogadzirira gunguo zvokudya zvaro, Kana vana varo vachichema kuna Mwari, Uchidzungaira pose-pose vachishaiwa zvokudya.