Read Shona Union Version 2002 Jobho 39 Bible Online

Jobho 39 - Shona Union Version 2002 bible

Jobho 39

¹“Iwe unoziva nguva inobereka ngururu here? Kana iwe ungaona kana nondo dzichibereka here?

²Iwe ungagona kuverenga mwedzi yokutora kwadzo mazamu here? Kana iwe unoziva nguva yadzinobereka nayo here?

³Dzinokotama, ndokubereka vana vadzo, Dzinorasha ushungu hwadzo.

⁴Vana vadzo vanosimba, vanokurira kusango; Vanoenda vakasadzokazve.

⁵Ndianiko akaregedza mbizi isina kusungwa? Kana ndianiko akasunungura zvisungo zvembizi?

⁶Ndakaita renje imba yayo, Nenyika yebare hugaro hwayo.

⁷Inozvidza bope romuguta, Hainzwi kuchaira kwomuchairi.

⁸Nyika yamakomo ndiwo mafuro ayo, Inotsvaka mashizha ose matema.

⁹Ko nyati ingatenda kukubatira here? Kana ingavata pachidyiro chemombe dzako here?

¹⁰Ko iwe ungasunga nyati negashu rayo mumuhoronga, Kana ingaputsa mavhinga ichikutevera here?

¹¹Ungaitenda, zvaine simba guru here? Kana kuiregera basa rako here?

¹²Ungavimba nayo kuti iise zviyo zvako kuguta, Nokuzviunganidzira paburiro rako here?

¹³Mhou inofara namapapiro ayo; Ko mapapiro ayo neminhenga yayo zvino hunyoro here?

¹⁴Nokuti inosiya mazai ayo pasi pavhu, Inoadziyisa muguruva,

¹⁵Ichikanganwa kuti angapwanyiwa netsoka dzavanhu, Kana kuti angatsikwa nezvikara.

¹⁶Inovangararira vana vayo savanenge vasati vari vayo; Kunyange yakatambudzikira pasina, haine hanya;

¹⁷Nokuti Mwari wakaitorera huchenjeri, Haana kuipa njere.

¹⁸Panguva yainosimuka kuti itize, Inoshora bhiza nomutasvi waro

¹⁹Iwe wakapa bhiza simba raro here? Ndiwe wakashongedza mutsipa waro nezenze rinopepereka here?

²⁰Iwe wakarichirikisa semhashu here? Simba rokupfeza kwaro rinotyisa.

²¹Rinoteta pasi mumupata, richifarira simba raro; Rinobuda kundoshongana navarume vakashonga nhumbi dzokurwa nadzo.

²²Rinoseka kutya, harivhunduswi; Haridzoki kana richiona munondo.

²³Goba rinorira pamusoro paro, Uye pfumo nebakatwa zvinopenya.

²⁴Rinopedza pasi nokutsamwa nehasha; Harimiri kana richinzwa inzwi rehwamanda.

²⁵Nguva ipi neipi kana hwamanda ichirira, rinoti, ‘Hekani!’ Rinofembedza kurwa kana kuchiri kure, Nokutinhira kwamachinda, nebope.

²⁶Ko ruvangu runoengerera nohuchenjeri hwako here, Ruchitambanudzira mapapiro arwo kurutivi rwezasi here?

²⁷Ko gondo rinokwira nokuraira kwako, Richindovaka dendere raro pakakwirira here?

²⁸Rinogara padombo, richivatapo, Pashongwe yedombo napanhare.

²⁹Rinonanganidza zvokudya zvaro riripo, Meso aro anozviona zviri kure.

³⁰Vana varowo vanosveta ropa; Pane chakaurawa ndipo pariri.”