Read Shona Union Version 2002 Jobho 4 Bible Online

Jobho 4 - Shona Union Version 2002 bible

Jobho 4

¹Ipapo Erifazi muTemani akapindura, akati,

²“Kana munhu akaidza kutaurirana newe, iwe uchava neshungu here? Asi ndiani angazvidzora, akasataura hake?

³Tarira, iwe wakadzidzisa vazhinji, Iwe wakasimbisa maoko akashaiwa simba.

⁴Mashoko ako akatsigira akanga achivavarira kuwa, Iwe wakasimbisa mabvi akanga achigweda-gweda.

⁵Asi zvino zvasvika kwauri, iwe woshaiwa simba; Zvakubata, zvino wotambudzika.

⁶Ko kutya kwako Mwari harizi simba rako here? Kururama kwenzira dzako haizi tariro yako here?

⁷Rangarira hako, ndianiko asine mhaka akatongoparara? Kana vakarurama vakatongoparadzwa papi?

⁸Sezvandakaona ini, vanhu, vanorimira zvakaipa, Navanodyara zvakashata, ndivo vanokohwawo izvozvo.

⁹Vanoparadzwa nomweya waMwari, Vanopedzwa nokufema kwokutsamwa kwake.

¹⁰Kunduruma kweshumba nezwi reshumba inehasha, Nameno evana veshumba anoparadzwa.

¹¹Shumba, yakwegura, inofa nokushaiwa zvingabata; Navana veshumbakadzi vanoparadzirwa.

¹²Zvino ndakaziviswa shoko rakavanda; Nzeve yangu yakanzwa zeve-zeve raro.

¹³Pandangariro dzinobva pane zvinoonekwa usiku, Kana vanhu vabatwa nehope huru;

¹⁴Kutya nokubvunda kwakandiwira, Kwakabvundisa mapfupa angu ose.

¹⁵Ipapo mweya wakapfuura pamberi pechiso changu; Mvere dzenyama yangu dzikasimuka.

¹⁶Wakamira, asi ndakanga ndisingagoni kuona kuti akadini; Mufananidzo wangu wakanga uri pamberi pameso angu; Kunyarara kukavapo, ndikanzwa izwi richiti,

¹⁷‘Ko munhu, anofa, angakunda Mwari pakururama here? Ko munhu angakunda Muiti wake pakunaka here?

¹⁸Tarirai, haatendi varanda vake; Vatumwa vake anovapa mhaka achiti mapenzi;

¹⁹Ndoda vanogara mudzimba dzevhu, Nheyo dzadzo dzakateyiwa paguruva, Dzinopwanyiwa sezvivhundudzi.

²⁰Vanoparadzwa pakati pamagwanani namadekwana; Vanoparara nokusingaperi, pasina munhu ane hanya nazvo.

²¹Ko bote retente ravo harina kuvhomorwa pamwechete navo here? Vanofa vasina uchenjeri.’ ”