Read Shona Union Version 2002 Jobho 40 Bible Online

Jobho 40 - Shona Union Version 2002 bible

Jobho 40

¹Zvino Jehovha akapfuura kupindura Jobho, akati,

²“Ko munhu, anokakavara, angaita nharo nowaMasimbaose here? Anoita nharo naMwari ngaapindure.”

³Ipapo Jobho akapindura Jehovha, akati

⁴“Tarirai, ini ndiri muduku hangu; ndingakupindurai here? Ndinofumbira muromo wangu.

⁵Ndakataura kamwe, asi handingapindurizve; Zvirokwazvo kaviri, asi handingapamhidzizve.”

⁶Ipapo Jehovha akapindura Jobho ari muchamupupuri, akati,

⁷“Chizvisunga chiuno chako zvino somurume; Ndichakubvunzisisa, iwe undipindure.

⁸Ko iwe unoda kukanganisa kutonga kwangu, Unoda kundipa mhosva, kuti iwe ururamiswe here?

⁹Iwe unoruoko rwakafanana norwaMwari here? Iwe ungatinhira nezwi rakafanana nerake here?

¹⁰Chizvishongedza zvino noukuru nokukudzwa; Ufukidze nokurumbidzwa nohumambo.

¹¹Durura hasha dzako dzinopfachuka; Utarire mumwe nomumwe anozvikudza, umuninipise.

¹²Tarira mumwe nomumwe anozvikudza, umuderedze. Tsika pasi vakaipa ipapo pavamire.

¹³Uvavige pamwechete paguruva; Sunga zviso zvavo pakavanda.

¹⁴Ipapo ndichakurumbidzawo, Ndichiti ruoko rwako rworudyi rungakuponesa.

¹⁵Tarira zvino mvuu, yandakaita pamwechete newe; Inodya uswa senzombe.

¹⁶Tarira zvino simba rayo riri muchiuno chayo; Kusimba kwayo kuri pamakakava edumbu rayo.

¹⁷Inotsvikidza muswe wayo somusidhari; Marunda ezvitumbi zvayo akarukwa-rukwa.

¹⁸Mapfupa ayo akafanana nendarira dzine mhango; Mbabvu dzayo dzakafanana namazariro amatare.

¹⁹Ndiyo huru pamabasa aMwari; Iye, akaiita, akaipa munondo wayo.

²⁰Zvirokwazvo, makomo anoivigira zvokudya zvayo; Ipapo panotamba mhuka dzose dzesango.

²¹Inovata pasi pemiti yemirotusi, Pamumvuri wetsanga napamurove.

²²Miti yemirotusi inoifukidza nomumvuri wayo; Mikondachando yomurukova inoipoteredza.

²³Tarira, kana rwizi rukafema nokunze, haidederi; Haityi, kunyange Jorodhani rukazara kusvikira pamuromo wayo.

²⁴Ko munhu ungaibata kana yakarindira here, Kana kuurura mhino dzayo norwauro here?