Read Shona Union Version 2002 Jobho 41 Bible Online

Jobho 41 - Shona Union Version 2002 bible

Jobho 41

¹“Ko ungagona kubata ngwena nechiredzo, Kana kutsikirira rurimi rwayo norwonzi here?

²Ungagona kupinza rwauro pamhino dzayo, Kana kuurura rushaya rwayo nechikokovono?

³Ko ingakunyengetera zvikuru here? Kana ingataura mashoko manyoro kwauri?

⁴Ingaita sungano newe here, Kuti uiite muranda wako nokusingaperi?

⁵Ungatamba nayo sezvaungaita neshiri here? Kana ungaisunga kuti vanasikana vako vatambe nayo?

⁶Mapoka avabati vehove angaitengesa here? Vangaigovera vatengi?

⁷Ungagona kuzadza ganda rayo nemiseve yenzeve here, Kana musoro wayo namapfumo ehove?

⁸Isa ruoko rwako pamusoro payo; Rangarira kurwa, haungapamhidzizve.

⁹Tarira, tariro yake hapana; Munhu haangaori mwoyo nokuiona bedzi here?

¹⁰Hakuna munhu anotyisa angatsunga kuivamba, Zvino ndianiko angagona kumira pamberi pangu here?

¹¹Ndianiko akatanga kundipa, kuti ndifanire kumuripirazve? Zvose zviri pasi pedenga rose ndezvangu.

¹²Handinganyarari kurondedzera mitezo yayo, Kana simba rayo, kana muturu wayo wakanaka.

¹³Ndianiko angagona kubvisa nguo yayo yokunze? Ndianiko angapinda pakati pemisara miviri yameno ayo?

¹⁴Ndianiko angagona kuzarura mikova yechiso chayo? Pameno payo panotyisa kwazvo.

¹⁵Makwande ayo, ane simba, ndiko kuzvikudza kwayo; Akabatanidzwa nechisimbiso chakabata.

¹⁶Ari pedyo nepedyo, Mhepo haigoni kupinda napakati pawo.

¹⁷Akabatanidzwa; Anonamatirana, haangaparadzaniswi.

¹⁸Kuhotsira kwayo kunopenya chiedza; Meso ayo akafanana namafungiro amangwanani.

¹⁹Mumuromo mayo munobuda mazhenje anopfuta; Masasaradzi omoto anobarika achibvamo.

²⁰Utsi hunobuda pamhino dzayo, Sapahari inovira nenhokwe dzinopfuta.

²¹Mweya wayo unobatidza masimbe, Uye murazvo womoto unobuda mumuromo mayo.

²²Simba rinogara mumutsipa wayo, Kutyisa kunotamba pamberi payo.

²³Nyama dzayo dzakabatanidzwa kumativi ose, Dzakasimba pairi, hadzingazununguswi.

²⁴Mwoyo wayo wakasimba sebwe; Zvirokwazvo, wakasimba seguyo.

²⁵Kana ichisimuka, vane simba vanotya; Vanopenga nokuvhunduswa.

²⁶Kana munhu akaitema nomunondo, haune simba; Kunyange nepfumo, kana nomuseve, kana matare anopinza.

²⁷Iyo inoti matare mashanga, Uye ndarira danda rakaora.

²⁸Museve haungaitizisi; Mabwe anoposhwa nechifuramabwe inoti makoto.

²⁹Tsvimbo dzakaita samakoto; Inoseka kana ichinzwa kuunga kwebakatwa.

³⁰Pasi payo pakafanana nezvaenga zvinocheka; Inoita sokukwekweredza chireyi chine mbambo mumatope.

³¹Inovirisa mvura yakadzika sehari; Inoita gungwa samafuta okuzora.

³²Inotara nzira inopenya shure kwayo; Zvimwe munhu ungati, mvura yakadzika yachena vhudzi.

³³Panyika hapana chakafanana nayo, Chakaitwa chisina kutya.

³⁴Inoona zvose zvakakwirira; Ndiyo mambo wezvikara zvose zvinozvikudza.”