Read Shona Union Version 2002 Jobho 7 Bible Online

Jobho 7 - Shona Union Version 2002 bible

Jobho 7

¹Ko munhu haatambudziki here pabasa panyika? Mazuva ake haana kufanana namazuva omubatiri here?

²Somuranda anoshuva mumvuri, Nomubatiri anotarira mubairo wake;

³Saizvozvo ini ndakapiwa mwedzi isina maturo, Ndakatarirwa usiku hwenjodzi.

⁴Kana ndovata, ndinoti, “Ndichamuka riniko?” Asi usiku hwakareba; Ndinoramba ndichishanduka-shanduka kusvikira kwoedza.

⁵Nyama yangu yakafukidzwa nehonye namavhinga evhu; Ganda rangu rinofunuka, richiputika hurwa.

⁶Mazuva angu anokunda chirukiso chomuruki pakukurumidza, Anopera ndisine tariro.

⁷Rangarirai henyu kuti upenyu hwangu imhepo hayo; Ziso rangu harichazooni zvakanaka.

⁸Ziso romunhu unondiona harichazonditaririzve; Meso ako achanditarira, asi handichazovepo.

⁹Sokupera kwegore nokunyangarika kwaro, Saizvozvo munhu, anoburukira kuSheori, haangazokwirizve.

¹⁰Haangazodzokeri kumba kwake, Nenzvimbo yake haingazomuzivi.

¹¹Saka handinganyarari nomuromo wangu; Ndichataura pakutambudzika kwomweya wangu; Ndichanyunyuta neshungu dzangu dzomwoyo.

¹²Ndiri gungwa kanhi, kana zimhuka regungwa, Zvamunoisa vanondirindira?

¹³Kana ndikati, “Nhoo yangu ichandinyaradza, Mubhedha wangu uchazorodza kunyunyuta kwangu;”

¹⁴Ipapo mondivhundusa nokurota hope, Mondityisa nezvandinoona;

¹⁵Naizvozvo mwoyo wangu unotsaura kudzipwa, Nokufa kupfuura mapfupa angu awa.

¹⁶Ndinosema upenyu hwangu; handidi kurarama nokusingaperi; Ndiregei; nokuti mazuva angu akafanana nokufema.

¹⁷Munhu chinyiko, zvamunomukudza, Nokumuda nomwoyo wenyu wose,

¹⁸Zvamunomushanyira mangwanani ose, Nokumuidza nguva dzose?

¹⁹Mucharega riniko kundicherekedza, Nokundirega kusvikira ndamedza mate angu?

²⁰Kana ndichinge ndatadza, ndingakuiteiko imi, mucherekedzi wavanhu? Makandiitireiko chinhu chamunovavarira, Kuti ini ndizviremedze?

²¹Munoregereiko kukanganwira kudarika kwangu, nokubvisa kutadza kwangu? Nokuti zvino ndichavata pasi muguruva; Muchanditsvaka zvikuru, asi handichazovepo.