Read Shona Union Version 2002 Jobho 9 Bible Online

Jobho 9 - Shona Union Version 2002 bible

Jobho 9

¹Ipapo Jobho akapindura, akati,

²“Zvirokwazvo ndinoziva kuti ndizvo, Nokuti munhu angava akarurama pamberi paMwari seiko?”

³Kana iye akada kuita nharo naye, Haangagoni kumupindura shoko rimwe pamashoko ane zviuru.

⁴Iye ano mwoyo wakangwara, une simba guru; Ndianiko akamuomesera mwoyo wake, akazofara?

⁵Iye anobvisa makomo, iwo asingazvizivi, Kana achiashandura pakutsamwa kwake.

⁶Iye anozunungusa nyika ikabva panzvimbo yayo, Mbiru dzayo dzinodengenyeka.

⁷Iye anoraira zuva, rikarega kubuda; Iye anodzitira nyeredzi.

⁸Iye oga anotatamura denga, Anotsika pamusoro pamafungu egungwa.

⁹Iye anoita nyeredzi dzeAkituro, nedzeOrinoni, nedzeChimutanhatu, Namakamuri enyasi.

¹⁰Iye anoita zvinhu zvikuru zvisinganzverwi, Izvo zvinhu zvinoshamisa, zvisingagoni kuverengwa.

¹¹Tarira, anopfuura pedyo neni, ndisingamuoni; Anopfuurawo hake, asi handimuoni.

¹²Tarira, anotora hake, ndiani angamudzivisa? Ndiani angati kwaari, “Unoiteiko?”

¹³Mwari haangadzori kutsamwa kwake; Vabatsiri vaRahabhi vakakotamira pasi pake.

¹⁴Ko zvino ini ndichamupindura seiko, Nditsaure mashoko angu ndiite nharo naye?

¹⁵Kunyange ndaiva akarurama handizaimupindura; Ndaikumbira nyasha kumutongi wangu.

¹⁶Kana ndichinge ndadana, akandipindura, Kunyange zvakadaro handizaitenda kuti akanzwa izwi rangu.

¹⁷Nokuti anondiputsa nedutu remhepo, Anowanza mavanga angu ndisine mhosva hangu.

¹⁸Handitenderi kutema mweya wangu, Asi anondizadza nezvinovava.

¹⁹Kana riri simba guru, tarira, iye anaro! Kana iri mhosva inotongwa, ndiani achanditarira nguva?

²⁰Kunyange ndaiva akarurama hangu, muromo wangu umene uchandipa mhaka; Kunyange ndaiva akakwana, iye aiti handina kururama.

²¹Ndakakwana hangu, handizvirangariri; Ndinozvidza upenyu hwangu.

²²Zvose zvakafanana hazvo; saka ndinoti, “Iye anoparadza vakarurama navakaipa vose.”

²³Kana nyatwa ichinge yauraya nokukurumidza, Iye achaseka njodzi yavasina mhosva.

²⁴Nyika yakaiswa mumaoko avakaipa; Iye anofukidza meso avatongi vayo; Kana asiri iye, zvino ndianiko?

²⁵Zvino mazuva angu anokurumidza kupfuura mumhanyi; Anotiza asina kuona zvakanaka.

²⁶Apfuura sezvikepe zvinomhanyisa; Segondo rinokurumidzira chiurawa.

²⁷Kana ndikati, “Ndichakanganwa kunyunyuta kwangu, Ndicharega chiso changu chinopunyaira, ndifare hangu.”

²⁸Ndinotya njodzi dzangu dzose, Ndinoziva kuti hamungati handine mhosva.

²⁹Ndichapiwa mhosva; Zvino ndinotamburireiko zvisina maturo?

³⁰Kana ndikangura nemvura yechando, Ndikachenesa maoko angu kwazvo;

³¹Kunyange zvakadaro imi mungandinyudza mumatope, Nenguo dzangu dzichandisema.

³²Nokuti iye haazi munhu akafanana neni, kuti ndimupindure, Kuti tikwirirane pakutonga.

³³Hakuna mununuri pakati pedu, Ungatibata tose noruoko rwake.

³⁴Ngaabvise shamhu yake kwandiri, Hasha dzake dzirege kundityisa;

³⁵Ipapo ndaitaura, ndisingamutyi; Nokuti handizakadaro hangu.