Read Shona Union Version 2002 Mapisarema 10 Bible Online

Mapisarema 10 - Shona Union Version 2002 bible

Mapisarema 10

¹Munomirireiko kure, Jehovha? Munozvivanzireiko panguva dzokutambudzika?

²Pakuzvikudza kwake akaipa anotambudza murombo zvikuru; Ngavabatwe namano avakafunga.

³Nokuti wakaipa anozvirumbidza pamusoro pezvinoda mwoyo wake, Anoruchiva anoramba Jehovha nokumuzvidza.

⁴Nokuzvikudza kwechiso chake, wakaipa anoti, “Haangabvunzi.” Ndangariro dzake dzose dzinoti, “Hakuna Mwari.”

⁵Nzira dzake dzakasimba nguva dzose; Zvamunotonga imi zviri kure kumusoro, haazvioni; Kana vari vadzivisi vake vose, anovashora.

⁶Anoti mumwoyo make, “Handingazununguswi; Handingavi panhamo kusvikira kumarudzi angu ose.”

⁷Muromo wake uzere nokutuka nokunyengera nokumanikidza; Zvakashata nezvakaipa zviri pasi porurimi rwake.

⁸Anogara panzvimbo dzokuvanda dzemisha; Pakavanda ndipo paanouraya asina mhosva; Meso ake anovandira asina wokumubatsira.

⁹Anovandira pakavanda seshumba panzvimbo yayo; Anovanda kuti abate murombo; Anobata murombo, kana achimukakatira mumumbure wake.

¹⁰Anonyangira, anokotama pasi, Vasina mubatsiri vanowiswa nesimba rake.

¹¹Anoti mumwoyo make, “Mwari akanganwa; Anovanza chiso chake, haangatongozvioni.”

¹²Simukai Jehovha; Mwari simudzai ruoko rwenyu; Regai kukanganwa varombo.

¹³Akaipa anozvidzireiko Mwari, Achiti mumwoyo wake, “Hangabvunzi?”

¹⁴Mazviona henyu; nokuti munoona kutambudzika nokuchema, kuti muzvibate muruoko rwenyu; asinamubatsiri anozviisa kwamuri; Makava mubatsiri wenherera.

¹⁵Vhunai ruoko rwowakaipa. Kana ari munhu akashata, nzverai zvakaipa zvake, kusvikira musingazozviwani.

¹⁶Jehovha ndiye Mambo nokusingaperi-peri; Vahedheni vakaparadzwa munyika yake.

¹⁷Jehovha, makanzwa zvinodikanwa navanyoro; Muchasimbisa mwoyo yavo, mucharerekera nzeve yenyu;

¹⁸Kuti mutongere nherera neanotambudzwa, Kuti munhu wapanyika arege kuramba achivhundusa.