Read Shona Union Version 2002 Mapisarema 102 Bible Online

Mapisarema 102 - Shona Union Version 2002 bible

Mapisarema 102

¹Munyengetero weanotambudzika pakumanikidzwa kwake; anochema kwazvo pamberi paJehovha. Inzwai munyengetero wangu, Jehovha, Kuchema kwangu ngakusvikire kwamuri.

²Regai kundivanzira chiso chenyu pazuva rokutambudzika kwangu; Rerekerai nzeve yenyu kwandiri; Pazuva rokudana kwangu kurumidzai kundipindura.

³Nokuti mazuva angu anopera soutsi, Mapfupa angu anotsva sechitsa.

⁴Mwoyo wangu warohwa souswa, waoma; Nokuti ndinokanganwa kudya zvokudya zvangu.

⁵Nokuda kwezwi rokugomera kwangu Mapfupa angu anonamatira nyama yangu.

⁶Ndafanana nehukurwizi yomurenje; Ndava sezizi romumatongo.

⁷Handivati, ndafanana Neshiri iri yoga pamusoro pedenga reimba.

⁸Vavengi vangu vanondituka zuva rose; Avo vanondipengera vanonditukisa kwazvo.

⁹Nokuti ndakadya madota sezvokudya, Ndikavhenganisa zvokunwa zvangu nemisodzi.

¹⁰Nokuda kwehasha dzenyu nokutsamwa kwenyu; Nokuti makandisimudza mukandirasha.

¹¹Mazuva angu akafanana nomumvuri wareba; Ndaoma souswa.

¹²Asi imi Jehovha, muchavapo nokusingaperi; Marudzi namarudzi achakurangarirai.

¹³Imi muchasimuka, mukanzwira Zioni ngoni; Nokuti nguva yavapo yokurinzwira tsitsi, zvirokwazvo, nguva, yakatarwa, yasvika.

¹⁴Nokuti varanda venyu vanofarira mabwe aro, Vanonzwira tsitsi guruva raro.

¹⁵Naizvozvo vahedheni vachatya zita raJehovha, Namadzimambo ose apasi kubwinya kwenyu;

¹⁶Jehovha zvaakavaka Zioni, Akaonekwa nokubwinya kwake;

¹⁷Akava nehanya nomunyengetero wavakakumurwa, Akasazvidza munyengetero wavo.

¹⁸Izvi zvichanyorerwa rudzi runozouya; Vanhu, vachazosikwa, vacharumbidza Jehovha.

¹⁹Nokuti wakatarira pasi ari panzvimbo yake tsvene yakakwirira; Jehovha akacherekedza nyika ari kudenga;

²⁰Kuti anzwe kugomera kwomusungwa; Kuti asunungure vana vorufu;

²¹Kuti vanhu vaparidze zita raJehovha paZioni, Nokurumbidzwa kwake paJerusaremu;

²²Kana marudzi avanhu aungana, Noushe huzhinji, kuti vashumire Jehovha.

²³Wakatapudza simba rangu panzira; Wakafupisa mazuva angu.

²⁴Ndakati, “Mwari wangu, regai kundibvisa mazuva angu achigere kusvika; Makore enyu anosvika kumarudzi namarudzi.”

²⁵Makateya nyika kare-kare; Nedenga rose ibasa ramaoko enyu.

²⁶Zvichaparara izvo, asi imi muchagara muripo; Zvirokwazvo, izvozvo zvose zvichasakara senguo; Muchazvishandura sechisimiro, zvikashanduka;

²⁷Asi imi hamushanduki, Makore enyu haangavi nomugumo.

²⁸Vana vavaranda venyu vachagara varipo, Navana vavo vachasimbiswa pamberi penyu.