Read Shona Union Version 2002 Mapisarema 103 Bible Online

Mapisarema 103 - Shona Union Version 2002 bible

Mapisarema 103

¹Pisarema raDhavhidhi. Rumbidzai Jehovha, mweya wangu; Zvose zviri mukati mangu ngazvirumbidze zita rake dzvene.

²Rumbidza Jehovha, mweya wangu, Urege kukanganwa mikomborero yake;

³Iye, anokanganwira zvakaipa zvako zvose; Anoporesa kurwara kwako kwose;

⁴Anodzikinura hupenyu hwako pakuparadzwa; Anokuisa korona younyoro nengoni;

⁵Anogutisa mwoyo wako nezvakanaka; Kuti utsva hwako huvandudzwe segondo.

⁶Jehovha anoita zvinhu zvakarurama, Nokururamisira vose vanomanikidzwa.

⁷Akazivisa Mosesi nzira dzake, Navana vaIsiraeri zvaakaita.

⁸Jehovha anetsitsi nenyasha, Haachimbidziki kutsamwa, ane ngoni zhinji.

⁹Haangarambi achirwa; Uye haangarambi akatsamwa nokusingaperi.

¹⁰Haana kutiitira sezvakafanira zvivi zvedu, Kana kutipa mubayiro sezvakafanira zvakaipa zvedu.

¹¹Nokuti sokukwirira kwokudenga kumusoro, Ndizvo zvakaita kukura kwengoni dzake kuna vanomutya.

¹²Sokuva kure kwamabvazuva namavirira, Saizvozvo akabvisa kudarika kwedu kwose kure nesu.

¹³Sokunzwira tsitsi kwababa vana vake, Saizvozvo Jehovha anonzwira tsitsi vanomutya.

¹⁴Nokuti iye anoziva chatakaitwa nacho, Anorangarira kuti tiri guruva.

¹⁵Kana ari munhu, mazuva ake akaita souswa; Seruva resango, iye anokura saizvozvo.

¹⁶Nokuti imhepo inopfuura pamusoro paro, onei raenda; Nenzvimbo yaro haicharizivi.

¹⁷Asi ngoni dzaJehovha dziripo nokusingaperi-peri kuna vanomutya, Nokururama kwake kuvana vavana vavo;

¹⁸kuna ivo vanochengeta sungano yake, Nokuna vanorangarira zvaakaraira, kuti vazviite.

¹⁹Jehovha akasimbisa chigaro chake choushe kudenga-denga; Ushe hwake hunobata zvinhu zvose.

²⁰Rumbidzai Jehovha, imi vatumwa vake; Imi mhare dzine simba, munoita zvaakataura, Muchiteerera izwi reshoko rake.

²¹Rumbidzai Jehovha, imi hondo dzake dzose; Imi vashumiri vake, vanoita zvinomufadza.

²²Rumbidzai Jehovha, imi mabasa ake ose, Panzvimbo dzose dzoumambo hwake; Rumbidza Jehovha, mweya wangu!