Read Shona Union Version 2002 Mapisarema 104 Bible Online

Mapisarema 104 - Shona Union Version 2002 bible

Mapisarema 104

¹Rumbidza Jehovha, mweya wangu! Jehovha Mwari wangu, muri mukuru kwazvo; Makafukidzwa nokukudzwa noumambo.

²Imi munozvifukidza nechiedza sechisimiro; Munotatamura kudenga-denga somucheka wetende;

³Ndiye anoteya matanda edzimba dzake mumvura; Anoita makore ngoro yake; Anofamba pamusoro pamapapiro emhepo;

⁴Anoita mhepo nhume dzake; Nomoto, unopfuta, vashumiri vake;

⁵Akateya nheyo dzapasi; Kuti parege kuzununguswa nokusingaperi.

⁶Makapafukidza nemvura yakadzika sechisimiro; Mvura zhinji yakamira pamusoro pamakomo,

⁷Makati muchituka ikatiza; Izwi rokutinhira kwenyu rakati richinzwika, ikachimbidzika kuenda.

⁸Makomo akakwira, mipata yakaderera; Ikaenda kunzvimbo yamakaigadzirira,

⁹Makaitarira muganho, kuti irege kudarika; Kuti irege kudzoka kuzofukidza pasizve.

¹⁰Anotuma matsime mumipata; Mvura inoyerera napakati pamakomo;

¹¹Anonwisa mhuka dzose dzesango; Mbizi dzinopedza nyota yadzo.

¹²Shiri dzokudenga dzinogara paari, Dzinorira pakati pamatavi.

¹³Anodiridza makomo ari padzimba dzake; Pasi panogutiswa nechibereko chamabasa enyu.

¹⁴Anomeresa uswa hwezvipfuwo, Nemiriwo, inobatsira vanhu; Kuti abudise zvokudya pasi;

¹⁵Newaini inofadza mwoyo womunhu, Namafuta anobwinyisa chiso chake, Nechingwa chinosimbisa mwoyo womunhu.

¹⁶Miti yaJehovha inoguta; Iyo misidhari yeRebhanoni yaakasima;

¹⁷Apo panovaka shiri matendere adzo, Kana riri zimudo, miti yemisipiresi ndiyo imba yaro.

¹⁸Makomo marefu ndeetsoma; Matombo ndihwo utiziro hwembira.

¹⁹Akatara mwedzi kuti uratidze nguva; Zuva rinoziva nguva yokuvira kwaro.

²⁰Munoita rima, usiku ndokuvapo; Panguva iyo mhuka dzose dzedondo dzinobuda.

²¹Vana veshumba vanoomba vachitsvaka zvavangauraya, Vanotsvaka zvokudya zvavo kuna Mwari.

²²Kana zuva richibuda, dzinoenda hadzo, Dzichindovata mumapako adzo.

²³Zvino munhu obudira kubasa rake. Nokumurimo wake kusvikira madekwana.

²⁴Haiwa Jehovha, mabasa enyu mazhinji sei! Makaaita ose nenjere; Pasi pazere nepfuma yenyu.

²⁵Hero gungwa, rakakura ibamhi, Mukati maro mune zvinhu zvinokambaira zvisingagoni kuverengwa, Zvipenyu zviduku nezvikuru.

²⁶Hezvo zvikepe, zvinofamba; Heyo ngwena yamakaumba, kuti itambe mariri.

²⁷Izvi zvose zvinokumirirai, Kuti muzvipe zvokudya zvazvo nenguva yakafanira.

²⁸Zvamunozvipa imi, ndizvo zvazvinounganidza; Munotadzanura ruoko rwenyu, izvo ndokuguta nezvakanaka.

²⁹Munovanza chiso chenyu, izvo ndokuvhunduswa; Munozvitorera mweya wazvo, izvo ndokufa, Zvichidzokera kuguruva razvo.

³⁰Munotuma mweya wenyu, izvo ndokusikwa; Munovandudza chiso chevhu.

³¹Kubwinya kwaJehovha ngakugare nokusingaperi; Jehovha ngaafarire mabasa ake;

³²Iye anotarira pasi, ipo ndokubvunda; Unonyangata makomo, iwo ndokubudisa utsi.

³³Ndichaimbira Jehovha panguva yose youpenyu hwangu; Ndichaimbira Mwari wangu nziyo dzokurumbidza ndichiripo.

³⁴Kurangarira kwangu ngakumufadze; Ndichafara kwazvo muna Jehovha.

³⁵Vatadzi ngavaparadzwe pasi, Navakaipa ngavarege kuzovapo. Rumbidzai Jehovha, mweya wangu. Hareruya