Read Shona Union Version 2002 Mapisarema 105 Bible Online

Mapisarema 105 - Shona Union Version 2002 bible

Mapisarema 105

¹Vongai Jehovha, mudane zita rake; Zivisai zvaakaita pakati pendudzi dzavanhu.

²Muimbirei, mumuimbire nziyo dzokukudza; Rondedzerai mabasa ake ose anoshamisa.

³Zvirumbidzei muzita rake dzvene; Mwoyo yavanotsvaka Jehovha ngaifare kwazvo.

⁴Tsvakai Jehovha nesimba rake; Tsvakai chiso chake nguva dzose.

⁵Rangarirai mabasa ake anoshamisa, aakaita; Zvishamiso zvake, nezvaakatonga nomuromo wake;

⁶Imi vana vaAbhurahamu, muranda wake, Imi vanakomana vaJakobho, vasanangurwa vake.

⁷Ndiye Jehovha Mwari wedu; Zvaakatonga zviri pasi pose.

⁸Wakarangarira sungano yake nokusingaperi, Iro shoko raakaraira kumarudzi ane chiuru;

⁹Iyo sungano yaakaita naAbhurahamu, Nemhiko yake kuna Isaka.

¹⁰Akazvisimbisira Jakobho, kuti uve mutemo, Kuna Isiraeri kuti ive sungano isingaperi;

¹¹Achiti, “Ndichakupa iwe nyika yeKanani, Uve mugove wenhaka yenyu;”

¹²Panguva yavakanga vachiri varume vashoma pakuverengwa, Zvirokwazvo, vashoma kwazvo, navatorwa mairi;

¹³Vakafamba-famba vachibva kuno rumwe rudzi vachienda kuno rumwe, Nokubva kunoumwe ushe vachienda kuna vamwe vanhu.

¹⁴Haana kutendera munhu kuvaitira zvakaipa; Zvirokwazvo, wakatuka madzimambo nokuda kwavo;

¹⁵Achiti, “Musagunzva vazodzwa vangu, Navaporofita vangu musavaitira chakaipa.”

¹⁶Akadana nzara kuti iuye panyika; Akavhuna mudonzvo wose wechingwa.

¹⁷Akatuma murume pamberi pavo; Josefa akatengeswa akava muranda;

¹⁸Vakakuvadza tsoka dzake nezvisungo zvesimbi, Akasungwa namaketani amatare;

¹⁹Kusvikira panguva yakaitika shoko rake; Shoko raJehovha rakamuidza.

²⁰Mambo akatuma nhume akamusunungura; Mubati wendudzi dzavanhu, akamuregedza.

²¹Akamuita ishe weimba yake, Nomubati wepfuma yake yose;

²²Kuti araire machinda ake nokuda kwake, Nokudzidzisa vakuru vake huchenjeri.

²³Isiraeri akasvikawo Ijipiti; NaJakobho wakagara ari mutorwa panyika yaHamu.

²⁴Akawanza vanhu vake kwazvo, Akavapa simba rakapfuura ravadzivisi vavo.

²⁵Wakashandura mwoyo yavo kuti vavenge vanhu vake. Kuti vanyengere varanda vake.

²⁶Akatuma Mosesi muranda wake, NaAroni waakanga asanangura.

²⁷Ivo vakaratidza zviratidzo zvake pakati pavo, Nezvishamiso panyika yaHamu.

²⁸Akatuma rima, akaisvibisa; Vakasamukira mashoko ake.

²⁹Akashandura mvura yavo yose, ikaita ropa, Akauraya hove dzavo.

³⁰Nyika yavo yakazara namatatya, Mudzimba dzamadzimambo avo.

³¹Akataura, mapupira enhunzi akasvika, Nenda panyika yavo yose.

³²Akavapa chimvuramabwe panzvimbo yemvura, Uye moto wakapfuta munyika yavo.

³³Wakarovawo midzambiringa yavo nemionde yavo; Akavhuna-vhunawo miti yenyika yavo.

³⁴Akataura, mhashu dzikasvika, Namagwatakwata asingagoni kuverengwa.

³⁵Zvikapedza miriwo yose munyika yavo, Nokupedza zvibereko zvevhu ravo.

³⁶Akarovawo matangwe ose munyika yavo, Ivo vokutanga vesimba ravo rose.

³⁷Akavabudisa vane sirivha nendarama; Kwakanga kusina nomumwe pakati pamarudzi avo wakashaiwa simba.

³⁸Nyika yeIjipiti yakafara pakubva kwavo, Nokuti vakanga vabatwa nokutya nokuda kwavo.

³⁹Wakatatanura gore rikava chifukidzo; Nomoto kuzovhenekera usiku.

⁴⁰Vakakumbira, akauyisa zvihuta, Akavagutisa nechingwa chakabva kudenga.

⁴¹Akazarura dombo, mvura zhinji ikadzutuka; Ikayerera pakanga pakaoma sorwizi.

⁴²Nokuti akarangarira shoko rake dzvene, NaAbhurahamu muranda wake.

⁴³Akabudisa vanhu vake nomufaro, Navasanangurwa vake vachiimba.

⁴⁴Akavapa nyika dzavahedheni; Vakazvitorera zvakanga zvabatwa nendudzi dzavanhu;

⁴⁵Kuti vachengete zvaakatema, Nokuteerera mirairo yake. Hareruya.