Read Shona Union Version 2002 Mapisarema 106 Bible Online

Mapisarema 106 - Shona Union Version 2002 bible

Mapisarema 106

¹Hareruya. Vongai Jehovha, nokuti akanaka; Nokuti ngoni dzake dzinogara nokusingaperi.

²Ndianiko angareva zvinhu zvine simba zvakaitwa naJehovha, Kana kududzira kurumbidza kwake kwose?

³Vakaropafadzwa vanochengeta kururama, Naiye anoita zvakarurama nguva dzose.

⁴Ndirangarirei Jehovha, nounyoro hwamunahwo kuvanhu venyu; Ndishanyirei noruponeso rwenyu.

⁵Kuti ndione kukomborerwa kwavasanangurwa venyu, Kuti ndifare kwazvo nomufaro wavanhu venyu, Kuti ndirumbidze pamwechete nenhaka yenyu.

⁶Takatadza pamwechete namadzibaba edu, Takaita pamwechete namadzibaba edu, Takaita zvisina kururama, takaita zvakaipa.

⁷Madzibaba edu haana kunzwisisa zvishamiso zvenyu paIjipiti; Haana kurangarira ngoni dzenyu zhinji; Asi vakakumukirai pagungwa, ipo paGungwa Dzvuku.

⁸Kunyange zvakadaro akavaponesa nokuda kwezita rake, Kuti azivise simba rake guru.

⁹Akarairawo Gungwa Dzvuku, rikapwa, Akavafambisa pakadzika sapanenge pabani.

¹⁰Akavaponesa paruoko rwowaivavenga. Akavadzikinura paruoko rwomuvengi.

¹¹Mvura zhinji yakafukidza vadzivisi vavo; Kwakanga kusina nomumwe wavo akasara.

¹²Ipapo vakatenda mashoko ake; Vakaimba vachimurumbidza.

¹³Vakachimbidzika kukanganwa mabasa ake; Havana kurindira zano rake.

¹⁴Asi vakachiva kwazvo-kwazvo murenje, Vakaidza Mwari mugwenga.

¹⁵Akavapa chavakakumbira; Asi akatuma kuonda mumweya yavo.

¹⁶Vakagodora Mosesi pamisasa, NaAroni, mutsvene waJehovha.

¹⁷Pasi pakashama pakamedza Dhatani, Pakafukidza boka raAbhirami.

¹⁸Moto ukapfuta pakati peboka ravo; Murazvo ukapisa vakaipa.

¹⁹Vakaita mhuru paHorebhi, Vakanamata mufananidzo wakaumbwa.

²⁰Vakatsinhana saizvozvo kubwinya kwavo Nomufananidzo wemombe, inochera bundo.

²¹Vakakanganwa Mwari muponesi wavo, Wakaita zvinhu zvikuru paIjipiti;

²²Mabasa anoshamisa munyika yaHamu, Nezvinhu zvinotyisa paGungwa Dzvuku.

²³Saka akati, “Ndinoda kuvaparadza; Dai Mosesi musanangurwa wake asina kumira pamberi pake ipo pakuputsika, Kuti adzore kutsamwa kwake, arege kuvaparadza.”

²⁴Zvirokwazvo, vakazvidza nyika inofadza, Havana kutenda shoko rake;

²⁵Asi vakanyunyuta mumatende avo, Vakasateerera izwi raJehovha.

²⁶Saka wakavasimudzira ruoko rwake. Kuti avaparadze murenje;

²⁷Uye kuti aparadze vana vavo pakati pavahedheni. Avaparadzire panyika dzose.

²⁸Vakazvibatanidzawo naBhaaripeori, Vakadya zvakabayirwa vakafa.

²⁹Naizvozvo vakamutsamwisa nezvavakaita; Denda ndokupinda pakati pavo.

³⁰Ipapo Pinehasi akasimuka, akaita zvakarurama; Denda ndokuguma.

³¹Izvozvo zvikanzi kwaari kururama, Kusvikira kumarudzi namarudzi nokusingaperi.

³²Vakamutsamwisawo pamvura zhinji yeMeribha, Naizvozvo Mosesi akaoneswa nhamo nokuda kwavo;

³³Nokuti vakamukira mweya wake, Iye akataura nehasha nemiromo yake.

³⁴Havana kuparadza ndudzi dzavanhu, Sezvavakanga varairwa naJehovha;

³⁵Asi vakavengana navahedheni, Vakadzidza mabasa avo;

³⁶Vakashumira zvifananidzo zvavo; Izvo zvikava musungo kwavari.

³⁷Zvirokwazvo, vakabayira mweya yakaipa vanakomana vavo navanasikana vavo,

³⁸Vakateura ropa risina mhosva, iro ravanakomana vavo navanasikana vavo, Vakavabayira zvifananidzo zveKanani; Nyika ikasvibiswa neropa.

³⁹Vakasvibiswa saizvozvo namabasa avo, Vakapata pane zvavakaita.

⁴⁰Saka kutsamwa kwaJehovha kwakamukira vanhu vake, Akasema nhaka yake.

⁴¹Akavaisa muruoko rwavahedheni; Vakavavenga ndivo vaivabata.

⁴²Vavengi vavo vakavamanikidzawo, Vakaiswa pasi poruoko rwavo.

⁴³Akavarwira kazhinji, Asi vakamumukira pakurangana kwavo, Vakanyudzwa muzvakaipa zvavo.

⁴⁴Kunyange zvakadaro akatarira kutambudzika kwavo, Panguva yaakanzwa kuchema kwavo;

⁴⁵Akarangarira sungano yake nokuda kwavo, Akazvidemba nokuda kwokuwanda kwengoni dzake.

⁴⁶Akavanzwisawo tsitsi Navose vakanga vavatapa.

⁴⁷Tiponesei, Jehovha Mwari wedu, Tiunganidzei, tibve pakati pavahedheni, Kuti tivonge zita renyu dzvene, Tifarisise pakukurumbidzai.

⁴⁸Jehovha Mwari waIsiraeri ngaakudzwe, Kubva pakusingaperi kusvikira pakusingaperi. Vanhu vose ngavati, “Ameni.” Hareruya.