Read Shona Union Version 2002 Mapisarema 107 Bible Online

Mapisarema 107 - Shona Union Version 2002 bible

Mapisarema 107

¹“Vongai Jehovha, nokuti akanaka; Nokuti ngoni dzake dzinogara nokusingaperi.”

²Vakadzikinurwa vaJehovha ngavadaro, Ivo vaakadzikinura muruoko rwomudzivisi;

³Akavaunganidza panyika dzose, Kumabvazuva nokumavirira, Kumusoro nezasi.

⁴Vakafamba-famba murenje munzira yomugwenga; Havana kuwana muguta mavangagara.

⁵Vakafa nenzara neyota, Mweya wavo ukaziya mukati mavo.

⁶Ipapo vakachema kuna Jehovha pakutambudzika kwavo, Iye akavarwira panjodzi dzavo.

⁷Wakavafambisawo nenzira yakarurama, Kuti vasvike kuguta rokugara.

⁸Haiwa, dai vanhu vachirumbidza Jehovha nokuda kwokunaka kwake, Uye nokuda kwamabasa ake, anoshamisa, aakaitira vanakomana vavanhu!

⁹Nokuti anogutisa mweya, une nyota, Uye mweya, une nzara, anouzadza nezvakanaka.

¹⁰Ndivo, vakanga vagere murima nomumvuri worufu, Vakanga vakasungwa mukutambudzika namatare,

¹¹Nokuti vakamukira mashoko aMwari, Vakashora zano roWokumusorosoro;

¹²Saka wakaninipisa mwoyo yavo nokutambura; Vakawira pasi, kukasava nomunhu anobatsira.

¹³Ipapo vakachema kuna Jehovha panhamo yavo, Akavaponesa pamadambudziko avo.

¹⁴Akavabudisa parima nomumvuri worufu, Akadamburanya zvisungo zvavo.

¹⁵Haiwa, dai vanhu vachirumbidza Jehovha nokuda kwokunaka kwake, Uye nokuda kwamabasa ake, anoshamisa, aakaitira vanakomana vavanhu!

¹⁶Nokuti wakavhuna masuo endarira, Nokuguranya mazariro amatare.

¹⁷Mapenzi anotambudzika nokuda kwokudarika kwavo, Uye nokuda kwazvakaipa zvavo.

¹⁸Mweya wavo unosema zvokudya zvose; Vanoswedera pedyo namasuo orufu.

¹⁹Zvino vochema kuna Jehovha panhamo yavo, Iye anovaponesa pamadambudziko avo.

²⁰Anotuma shoko rake, ndokuvaporesa, Nokuvarwira pakuparadzwa kwavo.

²¹Haiwa, dai vanhu vachirumbidza Jehovha nokuda kwokunaka kwake, Uye nokuda kwamabasa ake anoshamisa, aakaitira vanakomana vavanhu!

²²Ngavabayire zvibayiro zvokuvonga, Nokududzira mabasa ake nokuimba.

²³Avo, vanoburukira kugungwa muzvikepe, Vanoshambadzira kumvura zhinji;

²⁴Ndivo vanoona mabasa aJehovha, Nezvishamiso zvake pakadzika.

²⁵Nokuti anoraira, ndokumutsa dutu guru, Rinomutsa mafungu aro.

²⁶Vanosimudzirwa kudenga; ndokuburukirazve pakadzika; Mweya wavo unonyauka nokuda kwenhamo.

²⁷Vanondeya-ndeya nokudzengedzeka somunhu akabatwa. Vapera mano.

²⁸Zvino vochema kuna Jehovha panhamo yavo, Iye ndokuvabudisa pamadambudziko avo.

²⁹Anonyaradza dutu remhepo, Mafungu aro ndokunyarara.

³⁰Ipapo vanofara nokuti anyarara; Zvino iye ndokuvasvitsa pakadzikama pavaida kuvapo.

³¹Haiwa, dai vanhu vachirumbidza Jehovha nokuda kwokunaka kwake, Uye nokuda kwamabasa ake anoshamisa aakaitira vanakomana vavanhu!

³²Ngavamukudzisewo paungano yavanhu, Vamurumbidze pamakurukota avakuru.

³³Anoshandura nzizi dzikaita renje, Namatsime emvura aite nyika yakaoma;

³⁴Nyika, inobereka zvakanaka, ive sango rebare, Nokuda kwezvakaipa zvavanogara mairi.

³⁵Anoshandura renje riite dziva remvura, Nenyika yakaoma iite matsime emvura.

³⁶Ndipapo paanogarisa vane nzara, Kuti vamutse guta rokugaramo;

³⁷Vadyare minda, vasime minda yemidzambiringa, Vawane zvibereko zvizhinji.

³⁸Akavaropafadzawo, vakawanda kwazvo; Akasatendera zvipfuwo zvavo kutapudzwa.

³⁹Zvino vakatapudzika nokuva vashoma. Nemhaka yokumanikidzwa, nenhamo, nokuzvidya mwoyo.

⁴⁰Anodurura kuzvidza pamusoro pamachinda, Achivadzungaidza murenje musina nzira.

⁴¹Kunyange zvakadaro, anogadza mushaiwi kumusoro kusina dambudziko, Achimumutsira mhuri samapoka amakwai.

⁴²Akarurama achazviona, akafara; Uye zvakaipa zvose zvichadzivirwa muromo wazvo.

⁴³Ani naani akachenjera achacherekedza zvinhu izvozvi, Vachafunga unyoro hwaJehovha.