Read Shona Union Version 2002 Mapisarema 108 Bible Online

Mapisarema 108 - Shona Union Version 2002 bible

Mapisarema 108

¹Rwiyo, Pisarema raDhavhidhi. Mwoyo wangu wakasimba, Mwari; Ndichaimba, zvirokwazvo, ndichaimba nziyo dzokurumbidza, nomweya wangu wose.

²Muka iwe mutengeranwa nembira; Ini ndimene ndichamuka mangwanani.

³Ndichakuvongai Jehovha, pakati pendudzi dzavanhu; Ndichakuimbirai nziyo dzokurumbidza pakati pavahedheni.

⁴Nokuti ngoni dzenyu ihuru kumusoro kwokudenga-denga, Uye zvokwadi yenyu inosvikira kudenga rose.

⁵Imi mukudzwe Mwari, kumusoro kwokudenga-denga; Kurumbidzwa kwenyu ngakuve kumusoro kwapasi pose.

⁶Kuti vadikanwi venyu varwirwe, Tiponesei noruoko rwenyu rworudyi, mutipindure.

⁷Mwari akataura pautsvene hwake, achiti, “Ndichafara kwazvo; Ndichaganhura Shekemu, ndichayera mupata weSukoti.

⁸Gireadhi ndeyangu naManase ndeyangu; Efuremuwo inhaviro yomusoro wangu; Judha ndiyo tsvimbo yangu youshe.

⁹Moabhu ndiwo mudziyo wangu wokushambidzira; Pamusoro peEdhomu ndipo pandichakandira shangu yangu; Ndichapururudza nokuda kwaFirisitia.”

¹⁰Ndianiko achandiisa muguta rakakombwa namasvingo? Ndianiko achandiperekedza ndiende Edhomu?

¹¹Hamuna kutirasha here, Mwari? Hamubudi Mwari, nehondo dzedu.

¹²Tibatsirei pamudzivisi wedu; Nokuti kubatsira kwavanhu hakuna maturo.

¹³MunaMwari tichaita noumhare; Nokuti ndiye achatsika vadzivisi vedu pasi.