Read Shona Union Version 2002 Mapisarema 109 Bible Online

Mapisarema 109 - Shona Union Version 2002 bible

Mapisarema 109

¹Kumutungamiriri wokuimba. Pisarema raDhavhidhi. Regai kunyarara, Mwari wokurumbidza kwangu;

²Nokuti vakandishamisira muromo wowakaipa, uye muromo unonyengedzera; Vakandireva norurimi rune nhema.

³Vakandikombawo namashoko embengo, Vakarwa neni pasina mhosva.

⁴Pakuvada kwangu vava vadzivisi vangu; Asi ini ndinonyengetera hangu.

⁵Vakanditsivira zvakaipa pane zvakanaka, zvandakavaitira, Nembengo pakuvada kwangu.

⁶Isai munhu akaipa ave ishe wake; Mudzivisi ngaamire paruoko rwake rworudyi.

⁷Kana achitongwa, ngaapiwe mhosva; Munyengetero wake ngaushandurwe zvivi.

⁸Mazuva ake ngaave mashoma; Mumwe ngaatore basa rake.

⁹Vana vake ngavave nherera, Uye mukadzi wake ngaave chirikadzi.

¹⁰Vana vake ngavave vadzungairi, navapemhi; Ngavatsvake zvokudya kure namatongo avo.

¹¹Waakadyirwa chikwerete ngaatore zvose zvaanazvo; Vatorwa ngavapambe zvose zvaakabatira.

¹²Ngakushaikwe munhu anomunzwira ngoni; Ngakushaikwe munhu anetsitsi nenherera dzake.

¹³Vana vake ngavarove; Zita ravo ngaridzimwe parudzi runotevera.

¹⁴Zvakaipa zvamadzibaba ake ngazvirangarirwe naJehovha; Zvivi zvamai vake ngazvirege kudzimwa.

¹⁵Ngazvirambe zviri pamberi paJehovha nguva dzose, Kuti aparadze kurangarirwa kwavo pasi.

¹⁶Nemhaka yokuti haana kurangarira kunzwira ngoni, Asi wakatambudza murombo nomushaiwi, Neanomwoyo wakaputsika, kuti avauraye.

¹⁷Zvirokwazvo, kutuka ndizvo zvaakada, zvikauyawo kwaari; Kukomborera haana kukufarira kukagara kure naye.

¹⁸Akazvifukidzawo nokutuka, zvikaita senguo yake, Zvikapinda mukati make semvura, Samafuta mumapfupa ake.

¹⁹Ngazvive kwaari sechisimiro chaanofukidza nacho, Segwarada raakazvisunga naro nguva dzose.

²⁰Uyu ndiwo mubayiro wavadzivisi vangu, unobva kuna Jehovha, Nowavanotaurira mweya wangu zvakaipa.

²¹Asi imi Jehovha Ishe, ndiitirei zvakanaka nokuda kwezita renyu; Ngoni dzenyu zvadzakanaka, ndirwirei.

²²Nokuti ndiri murombo nomushaiwi, Nomwoyo wangu wakakuvadzwa mukati mangu.

²³Ndaenda somumvuri wareba; Ndapepereswa semhashu.

²⁴Mabvi angu haachine simba nokuzvinyima zvokudya; Nyama yangu yaonda nokushaiwa mafuta.

²⁵Ndavawo chinhu chinozvidzwa navo; Kana vachindiona vanodzungudza misoro yavo.

²⁶Ndibatsirei, Jehovha, Mwari wangu; Ndiponesei nengoni dzenyu.

²⁷Kuti vazive kuti ndirwo ruoko rwenyu; Kuti imi Jehovha, ndimi makazviita.

²⁸Ngavatuke havo, asi imi ropafadzai; Kana vachisimuka, vachanyadziswa, asi muranda wenyu achafara kwazvo.

²⁹Vadzivisi vangu ngavafukidzwe nokunyadziswa, Ngavazvifukidze nokunyara kwavo sejasi.

³⁰Ndichavonga Jehovha kwazvo nomuromo wangu; Zvirokwazvo, ndichamurumbidza pakati pavazhinji.

³¹Nokuti iye achamira kuruoko rworudyi rwomushaiwi, Kuti amuponese panavanotonga mweya wake.