Read Shona Union Version 2002 Mapisarema 115 Bible Online

Mapisarema 115 - Shona Union Version 2002 bible

Mapisarema 115

¹Isu kwete, Jehovha, isu kwete, Asi zita renyu ngarikudzwe, Nokuda kwengoni dzenyu, uye nokuda kwokutendeka kwenyu.

²Vahedheni vachareverei, vachiti, “Ko Mwari wavo zvino uripi?”

³Asi Mwari wedu ari kudenga-denga; Akaita zvose zvaakada.

⁴Zvifananidzo zvavo sirivha nendarama, Basa ramaoko avanhu.

⁵Zvinemiromo, asi hazvitauri; Nameso zvinawo, asi hazvioni;

⁶Zvinenzeve, asi hazvinzwi; Nemhino zvinadzo, asi hazvinhuwidzi;

⁷zvina maoko, asi hazvibati; Namakumbo zvinawo, asi hazvifambi; Hazvitauri napahuro pazvo.

⁸Ivo vanozviita vachafanana nazvo; Zvirokwazvo, navose vanovimba nazvo.

⁹Iwe Isiraeri, vimba naJehovha; Ndiye mubatsiri wavo nenhoo yavo.

¹⁰Iwe imba yaAroni, vimba naJehovha; Ndiye mubatsiri wavo nenhoo yavo.

¹¹Imi munotya Jehovha, vimbai naJehovha; Ndiye mubatsiri wavo nenhoo yavo.

¹²Jehovha akatirangarira; iye achatiropafadza; Acharopafadza imba yaIsiraeri; Acharopafadza imba yaAroni.

¹³Acharopafadza vanotya Jehovha, Vaduku navakuru vose.

¹⁴Jehovha acharamba achikuwanzai, Imi navana venyu.

¹⁵Imi makaropafadzwa naJehovha, Iye akaita kudenga napasi.

¹⁶Kudenga-denga ndiko kudenga-denga kwaJehovha; Asi pasi akapa vanakomana vavanhu.

¹⁷Vakafa havarumbidzi Jehovha, Kunyange ani naani anoburukira kwakanyarara;

¹⁸Asi isu hedu tichakudza Jehovha Kubva panguva ino kusvika pakusingaperi. Hareruya!