Read Shona Union Version 2002 Mapisarema 116 Bible Online

Mapisarema 116 - Shona Union Version 2002 bible

Mapisarema 116

¹Ndinoda Jehovha, nokuti anonzwa Izwi rangu nokukumbira kwangu.

²Zvaakarereka nzeve yake kwandiri, Ndichadana kwaari mazuva angu ose.

³Misungo yorufu yakandikomba, Kurwadziwa kweSheori kwakandibata; Ndakawana kutambudzika nokuchema.

⁴Ipapo ndakadana zita raJehovha; Haiwa Jehovha, ndinonyengetera kuti murwire mweya wangu.

⁵Jehovha anenyasha, akarurama; Zvirokwazvo, Mwari wedu ane tsitsi.

⁶Jehovha anochengeta vasina mano; Ndakanga ndashaiwa simba, iye akandiponesa.

⁷Dzokera kuzororo rako, mweya wangu; Nokuti Jehovha akakuitira zvakanaka.

⁸Nokuti makarwira mweya wangu parufu; Nameso angu pamisodzi, Netsoka dzangu pakugumburwa.

⁹Ndichafamba pamberi paJehovha Panyika yavapenyu.

¹⁰Ndakatenda pakutaura kwangu, ndichiti, “Ndakamanikidzwa kwazvo;”

¹¹Ndakati pakuvhunduka kwangu, “Vanhu vose vanoreva nhema.”

¹²Ndichavigireiko Jehovha Pamusoro pemikomborero yake yose kwandiri?

¹³Ndichasimudza mukombe wokuponeswa, Ndichidana zita raJehovha.

¹⁴Ndicharipira Jehovha mhiko dzangu, Ndichazviita pamberi pavanhu vake vose.

¹⁵Chinhu chinokosha pamberi paJehovha, Ndirwo rufu rwavatsvene vake.

¹⁶Haiwa Jehovha, zvirokwazvo ndiri muranda wenyu; Ndiri muranda wenyu, mwanakomana womurandakadzi wenyu; Makasunungura misungo yangu.

¹⁷Ndichakubayirai zvibayiro zvokuvonga, Ndichidana zita raJehovha.

¹⁸Ndicharipira Jehovha mhiko dzangu, Ndichazviita pamberi pavanhu vake vose;

¹⁹Pavazhe dzeimba yaJehovha, Mukati mako, iwe Jerusaremu. Hareruya!