Read Shona Union Version 2002 Mapisarema 119 Bible Online

Mapisarema 119 - Shona Union Version 2002 bible

Mapisarema 119

¹Vakaropafadzwa avo vane nzira yakarurama, Vanofamba mumurau waJehovha.

²Vakaropafadzwa vanochengeta zvipupuriro zvake, Vanomutsvaka nomwoyo wose.

³Zvirokwazvo, havaiti chinhu chisina kururama, Vanofamba munzira dzake.

⁴Makatiraira zvirevo zvenyu, Kuti tizvichengete zvakanaka.

⁵Haiwa, dai nzira dzangu dzakagadzirirwa Kuchengeta mitemo yenyu!

⁶Ipapo handinganyadziswi, Kana ndichirangarira mirairo yenyu yose.

⁷Ndichakuvongai nomwoyo wakarurama, Kana ndichidzidza zvakatonga zvakarurama.

⁸Ndichachengeta mitemo yenyu; Haiwa, regai kundirasha chose.

⁹Jaya ringaramba richinatsa nzira yaro neiko? Kana richichenjerera sezvinoraira shoko renyu.

¹⁰Ndakakutsvakai nomwoyo wangu wose; Musanditendera kutsauka pamirairo yenyu.

¹¹Shoko renyu ndakariviga mumwoyo wangu, Kuti ndirege kukutadzirai.

¹²Imi munofanira kukudzwa, Jehovha; Ndidzidzisei mitemo yenyu.

¹³Ndakadudzira nemiromo yangu Zvose zvamakatonga nomuromo wenyu.

¹⁴Ndakafara kwazvo munzira yezvipupuriro zvenyu, Sezvandinofarira pfuma yose.

¹⁵Ndichafungisisa zvirevo zvenyu, Nokurangarira nzira dzenyu.

¹⁶Ndichazvifadza nemitemo yenyu; Handingakanganwi shoko renyu.

¹⁷Itirai muranda wenyu zvakanaka, kuti ndirarame; Ipapo ndichachengeta shoko renyu.

¹⁸Ndisvinudzei meso angu, kuti ndione Zvinhu zvinoshamisa zviri pamurau wenyu.

¹⁹Nokuti ndiri mutorwa panyika; Regai kundivanzira mirairo yenyu.

²⁰Mweya wangu wapera nokushuva Panguva dzose zvamakatonga.

²¹Makaraira vanozvikudza, Ngavatukwe vanotsauka pamirairo yenyu.

²²Bvisai kwandiri kushorwa nokuzvidzwa; Nokuti ndakachengeta zvipupuriro zvenyu.

²³Machindawo akagara akandireva; Asi muranda wenyu akafungisisa mitemo yenyu.

²⁴Zvipupuriro zvenyuwo zvinondifadza kwazvo, Ndizvo zvinondipa mano.

²⁵Mweya wangu unonamatira guruva; Ndiponesei neshoko renyu.

²⁶Ndakadudzira nzira dzangu, imi makandipindura; Ndidzidzisei mitemo yenyu.

²⁷Ndidzidzisei ndinzwisise nzira yezvirevo zvenyu; Ipapo ndichafungisisa mabasa enyu anoshamisa.

²⁸Mweya wangu unonyunguruka nokuremerwa; Ndisimbisei sezvinorehwa neshoko renyu.

²⁹Bvisai kwandiri nzira yenhema; Nenyasha dzenyu mundipe murau wenyu.

³⁰Ndakasanangura nzira yakatendeka; Ndakaisa zvamakatonga pamberi pangu.

³¹Ndinonamatira zvipupuriro zvenyu; Jehovha, regai kundinyadzisa.

³²Ndichamhanya nenzira yemirairo yenyu, Kana munenge makurisa mwoyo wangu.

³³Ndidzidzisei, Jehovha, nzira yemitemo yenyu; Ndigoichengeta kusvikira pakuguma.

³⁴Ndipei njere, ndichengete murau wenyu; Zvirokwazvo, ndichauchengeta nomwoyo wangu wose.

³⁵Ndifambisei munzira yemirairo yenyu; Nokuti ndinoifarira kwazvo.

³⁶Kweverai mwoyo wangu kuzvipupuriro zvenyu, Urege kukweverwa mukuchiva.

³⁷Dzorai meso angu ndirege kuona zvisina maturo, Mundiponese panzira dzenyu.

³⁸Simbisai Shoko renyu kumuranda wenyu, Rakakwanira vanokutyai.

³⁹Bvisai kushoorwa kwangu kwandinotya, Nokuti zvamakatonga zvakanaka.

⁴⁰Tarirai, ndakashuva zvirevo zvenyu; Ndiponesei mukururama kwenyu.

⁴¹Ngoni dzenyu ngadziuyewo kwandiri, Jehovha, Iko kuponesa kwenyu, sezvinoreva shoko renyu.

⁴²Naizvozvo ndichagona kupindura anondishora; Nokuti ndinovimba neshoko renyu.

⁴³Regai kubvisa shoko rezvokwadi chose pamuromo wangu; Nokuti ndakatarira zvamakatonga.

⁴⁴Naizvozvo ndichasichengeta murau wenyu Nokusingaperi-peri.

⁴⁵Ndichasifamba ndakasununguka, Nokuti ndakatsvaka zvirevo zvenyu.

⁴⁶Ndichataurawo zvipupuriro zvenyu pamberi pamadzimambo, Ndisinganyadziswi.

⁴⁷Ndichazvifadza kwazvo nemirairo yenyu, Yandinoda.

⁴⁸Ndichasimudzirawo maoko angu kumirairo yenyu, yandinoda; Ndichafungisisa mitemo yenyu.

⁴⁹Rangarirai shoko renyu kumuranda wenyu, Nokuti makandimutsira tariro.

⁵⁰Ndizvo zvinondinyaradza pakutambudzika kwangu; Nokuti shoko renyu rakandiponesa.

⁵¹Vanozvikudza vakandiseka kwazvo; Kunyange zvakadaro handina kutsauka pamurau wenyu.

⁵²Ndakarangarira zvamakatonga kare-kare, Jehovha, Ndikazvinyaradza.

⁵³Kutsamwa kukuru kwakandibata, Nokuda kwavakaipa vanorasha murau wenyu.

⁵⁴Mitemo yenyu yaiva nziyo dzangu Mumba muutorwa hwangu.

⁵⁵Ndakarangarira zita renyu, Jehovha, usiku, Ndikachengeta murau wenyu.

⁵⁶Ndizvo zvandakanga ndinazvo, Nokuti ndakachengeta zvirevo zvenyu.

⁵⁷Jehovha ndiye mugove wangu; Ndakati, ndichachengeta mashoko enyu.

⁵⁸Ndakakumbira chiso chenyu nomwoyo wangu wose; Ndinzwirei nyasha, sezvinoreva shoko renyu.

⁵⁹Ndakafunga nzira dzangu, Ndikadzorera tsoka dzangu kuzvipupuriro zvenyu.

⁶⁰Ndakakurumidza, handina kunonoka Kuchengeta mirairo yenyu.

⁶¹Mabote avakaipa akandimonera; Asi handina kukanganwa murau wenyu.

⁶²Ndichamuka pakati pousiku kuti ndikuvongei Pamusoro pezvamakatonga zvakarurama.

⁶³Ndiri shamwari yavose vanokutyai, Neyavanochengeta zvirevo zvenyu.

⁶⁴Jehovha, pasi pazere nengoni dzenyu; Ndidzidzisei mitemo yenyu.

⁶⁵Makaitira muranda wenyu zvakanaka, Jehovha, sezvinoreva shoko renyu.

⁶⁶Ndidzidzisei ungwaru hwakanaka nenjere; Nokuti ndakatenda mirairo yenyu.

⁶⁷Ndakati ndichigere kutambudzika ndikarashika; Asi zvino ndinochengeta shoko renyu.

⁶⁸Imi makanaka, uye munoita zvakanaka; Ndidzidzisei mitemo yenyu.

⁶⁹Vanozvikudza vakandipomera nhema; Ndichachengeta zvirevo zvenyu nomwoyo wangu wose.

⁷⁰Mwoyo wavo wakakora samafuta; Asi ini ndinofarira murau wenyu kwazvo.

⁷¹Zvakanga zvakanaka kuti nditambudzike; Kuti ndidzidze mitemo yenyu.

⁷²Murau womuromo wenyu wakanaka kwandiri Kukunda zviuru zvamazana zvendarama nesirivha.

⁷³Maoko enyu akandiita nokundisimbisa; Ndipei kunzwisisa, kuti ndidzidze mirairo yenyu.

⁷⁴Vanokutyai vachandiona ndokufara; Nokuti ndakatarira shoko renyu.

⁷⁵Ndinoziva, Jehovha, kuti zvamakatonga zvakarurama, Uye kuti makanditambudza nokutendeka.

⁷⁶Ndinokumbira kuti tsitsi dzenyu dzindinyaradze, Sezvamakareva kumuranda wenyu.

⁷⁷Unyoro hwenyu ngauye kwandiri, kuti ndirarame; Nokuti murau wenyu ndiwo mufaro wangu mukuru.

⁷⁸Vanozvikudza ngavanyadziswe; nokuti vakandiitira zvakaipa ndisina mhosva; Asi ndichafungisisa zvirevo zvenyu.

⁷⁹Vanokutyai ngavadzokere kwandiri, Vagoziva zvipupuriro zvenyu.

⁸⁰Mwoyo wangu ngaururame pamitemo yenyu; Kuti ndirege kunyadziswa.

⁸¹Mweya wangu unopanga kuponesa kwenyu; Asi ndinotarira shoko renyu.

⁸²Meso angu anopera nokutsvaka shoko renyu, Ndichiti, “Muchandinyaradza riniko?”

⁸³Nokuti ndava sehombodo iri muutsi; Kunyange zvakadaro handikanganwi mitemo yenyu.

⁸⁴Mazuva omuranda wenyu manganiko? Muchatonga riniko vanonditambudza?

⁸⁵Vanozvikudza vakandicherera hunza, Ivo vasingatereri murau wenyu.

⁸⁶Mirairo yenyu yose yakatendeka; Vanonditambudza ndisina mhosva; ndibatsirei imi.

⁸⁷Vakanga voda kundiparadza pasi; Asi handina kusiya zvirevo zvenyu.

⁸⁸Ndiponesei nokuda kwounyoro hwenyu; Naizvozvo ndichachengeta chipupuriro chomuromo wenyu.

⁸⁹Shoko renyu rakasimba kudenga Nokusingaperi, Jehovha.

⁹⁰Kutendeka kwenyu kunosvika kumarudzi namarudzi; Imi makasimbisa pasi, panoramba pagere.

⁹¹Zvinoramba zvigere nanhasi sezvamakatema; Nokuti zvinhu zvose varanda venyu.

⁹²Dai murau wenyu usina kuva mufaro wangu mukuru, Ndingadai ndakaparara nedambudziko rangu.

⁹³Handingatongokanganwi zvirevo zvenyu; Nokuti makandiponesa nazvo.

⁹⁴Ndiri wenyu, ndiponesei; Nokuti ndakatsvaka zvirevo zvenyu.

⁹⁵Vakaipa vakandigarira kuti vandiparadze; Asi ndichafunga zvipupuriro zvenyu.

⁹⁶Ndakaona kuguma kwezvose zvakakwana, Asi murayiro wenyu mupamhi kwazvo.

⁹⁷Haiwa, ndinoda murau wenyu seiko! Ndicho chandinofungisisa zuva rose.

⁹⁸Mirairo yenyu inondiita akachenjera kupfuura vavengi vangu; Nokuti inogara neni nokusingaperi.

⁹⁹Ndine njere kupfuura vadzidzisi vangu vose; Nokuti zvipupuriro zvenyu ndizvo zvandinofungisisa.

¹⁰⁰Ndinonzwisisa kupfuura vakakwegura, Nokuti ndakachengeta zvirevo zvenyu.

¹⁰¹Ndakadzora tsoka dzangu panzira dzose dzakaipa; Kuti ndichengete shoko renyu.

¹⁰²Handina kutsauka pane zvamatonga; Nokuti makandidzidzisa.

¹⁰³Mashoko enyu anonaka seiko mukanwa mangu! Zvirokwazvo, anokunda uchi mumuromo mangu!

¹⁰⁴Pazvirevo zvenyu ndinowana njere; Saka ndinovenga nzira dzose dzenhema.

¹⁰⁵Shoko renyu ndiwo mwenje wetsoka dzangu, Nechiedza panzira yangu.

¹⁰⁶Ndakapika, ndikazvisimbisa, Kuti ndichachengeta zvamakatonga zvakarurama.

¹⁰⁷Ndinotambudzika kwazvo; Ndiponesei, Jehovha, neshoko renyu.

¹⁰⁸Gamuchirai henyu Jehovha ndizvo zvandinokumbira zvipo zvomuromo wangu zvandinopa nomwoyo wangu, Mundidzidzise zvamakatonga.

¹⁰⁹Mweya wangu unongosiva muruoko rwangu; Kunyange zvakadaro handikanganwi murau wenyu.

¹¹⁰Vakaipa vakanditeyera musungo; Kunyange zvakadaro handina kutsauka pazvirevo zvenyu.

¹¹¹Zvipupuriro zvenyu ndakazviita nhaka yangu nokusingaperi; Nokuti ndizvo zvinofadza mwoyo wangu.

¹¹²Ndakarerekera mwoyo wangu kuti uite mitemo yenyu, Nokusingaperi, kusvikira pakuguma.

¹¹³Ndinovenga vane mwoyo miviri; Asi ndinoda murau wenyu.

¹¹⁴Imi muri chivando changu nenhoo yangu; Ndinotarira shoko renyu.

¹¹⁵Ibvai kwandiri, imi munoita zvakaipa; Kuti ndichengete mirairo yaMwari wangu.

¹¹⁶Nditsigirei sezvinoreva shoko renyu, kuti ndirarame; Kuti ndirege kunyadziswa pakutarira kwangu.

¹¹⁷Nditsigirei, ndichengetwe, Ndigoramba ndichirangarira mitemo yenyu.

¹¹⁸Makazvidza vose vanotsauka pamitemo yenyu; Nokuti kunyengera kwavo inhema.

¹¹⁹Vakaipa vose vapasi munovagumisa sefuro; Saka ndinoda zvipupuriro zvenyu.

¹²⁰Nyama yangu inobvunda nokukutyai; Ndinotya zvamakatonga.

¹²¹Ndakaita zvakatongwa nezvakarurama; Musandiisa kuvamanikidzi vangu.

¹²²Ivai rubatso rwomuranda wenyu kuti ndiitirwe zvakanaka; Vanozvikudza ngavarege kundimanikidza.

¹²³Meso angu apera nokutsvaka kuponesa kwenyu, Neshoko renyu rakarurama.

¹²⁴Itirai muranda wenyu nounyoro hwenyu, Mundidzidzise mitemo yenyu.

¹²⁵Ndiri muranda wenyu, ndipei njere; Kuti ndizive zvipupuriro zvenyu.

¹²⁶Inguva yaJehovha yokubata nayo; Nokuti vakaputsa murau wenyu.

¹²⁷Saka ndinoda mirairo yenyu Kupfuura ndarama, zvirokwazvo, kupfuura ndarama yakaisvonaka.

¹²⁸Saka ndinoti, zvirevo zvenyu zvose pamusoro pezvose zvakarurama; Ndinovenga nzira dzose dzenhema.

¹²⁹Zvipupuriro zvenyu zvinoshamisa; Saka mweya wangu unozvichengeta.

¹³⁰Kuzarurwa kwamashoko enyu kunopa chiedza; Kunopa njere vasina mano.

¹³¹Ndakashamisa muromo wangu kwazvo, ndikatakwaira; Nokuti ndakashuva mirairo yenyu.

¹³²Ringirirai kwandiri, mundinzwire nyasha, Sezvamunoitira vanoda zita renyu.

¹³³Simbisirai kutsika kwangu mushoko renyu; Zvakaipa ngazvirege kutonga vane simba pamusoro pangu.

¹³⁴Ndidzikinurei pakumanikidza kwomunhu; Naizvozvo ndichachengeta zvirevo zvenyu.

¹³⁵Chiso chenyu ngachivhenekere muranda wenyu; Mundidzidzise mitemo yenyu.

¹³⁶Nzizi dzemvura dzinoyerera pameso angu, Nokuti havachengeti murau wenyu.

¹³⁷Imi makarurama, Jehovha, Nezvamakatonga zvakaruramawo.

¹³⁸Makaraira zvipupuriro zvenyu nokururama Uye nokutendeka kukuru.

¹³⁹Kushingaira kwangu kwakandipedza, Nokuti vadzivisi vangu vakakangwana mashoko enyu.

¹⁴⁰Shoko renyu rakaisvonatswa; Saka muranda wenyu anorida.

¹⁴¹Ndiri muduku, ndakazvidzwa; Asi handikanganwi zvirevo zvenyu.

¹⁴²Kururama kwenyu ndiko kururama kusingaperi, Nomurau wenyu izvokwadi.

¹⁴³Nhamo nokumanikidzwa zvakandibata; Asi mirairo yenyu ndiwo mufaro wangu mukuru.

¹⁴⁴Zvipupuriro zvenyu zvakarurama nokusingaperi; Ndipei njere, ndigorarama.

¹⁴⁵Ndakadana nomwoyo wangu wose; ndipindurei, Jehovha; Ndichachengeta mitemo yenyu.

¹⁴⁶Ndakadana kwamuri; ndiponesei, Ndigochengeta zvipupuriro zvenyu.

¹⁴⁷Ndakatangira mambakwedza ndikadana; Ndakatarira mashoko enyu.

¹⁴⁸Meso angu akatangira nguva dzousiku, Kuti ndifungisise shoko renyu.

¹⁴⁹Inzwai izwi rangu nokuda kwounyoro hwenyu; Ndiponesei Jehovha, sezvinoreva zvamakatonga.

¹⁵⁰Vanotevera zvakaipa voswedera pedyo; Vari kure nomurau wenyu.

¹⁵¹Imi muri pedyo, Jehovha; Mirairo yenyu izvokwadi.

¹⁵²Kubva kare ndakaziva nezvipupuriro zvenyu Kuti makazviteya nokusingaperi.

¹⁵³Tarirai dambudziko rangu, mundirwire; Nokuti handikanganwi murau wenyu.

¹⁵⁴Ndireverei mhosva yangu, mundidzikinure; Ndiponesei sezvinoreva shoko renyu.

¹⁵⁵Kuponeswa kuri kure navakaipa; Nokuti havatsvaki mitemo yenyu.

¹⁵⁶Ngoni dzenyu izhinji, Jehovha; Ndiponesei sezvinoreva zvamakatonga.

¹⁵⁷Vatambudzi vangu navadzivisi vangu vazhinji; Kunyange zvakadaro handina kutsauka pazvipupuriro zvenyu.

¹⁵⁸Ndakaona vanyengedzeri, ndikavasema; Nokuti havana kuchengeta shoko renyu.

¹⁵⁹Fungai kuti ndinoda zvirevo zvenyu; Ndiponesei, Jehovha, nokuda kwounyoro hwenyu.

¹⁶⁰Unganidzo yeshoko renyu izvokwadi; Zvose zvamakatonga, zvakarurama, zvinogara nokusingaperi.

¹⁶¹Machinda akanditambudza ndisina mhosva; Asi mwoyo wangu unotya shoko renyu.

¹⁶²Ndinofarira shoko renyu kwazvo, Somunhu awana zvizhinji zvakapambwa.

¹⁶³Nhema ndinodzivenga nokudzisema; Asi murau wenyu ndinouda.

¹⁶⁴Ndinokurumbidzai kanomwe pazuva, Nokuda kwezvakarurama zvamakatonga.

¹⁶⁵Vanoda murau wenyu vane rugare rukuru; Hapana chinovagumbusa.

¹⁶⁶Ndakatarira kuponesa kwenyu, Jehovha, Ndikaita mirairo yenyu.

¹⁶⁷Mweya wangu wakachengeta zvipupuriro zvenyu; Ndinozvida kwazvo.

¹⁶⁸Ndakachengeta zvirevo zvenyu nezvipupuriro zvenyu; Nokuti nzira dzangu dzose dziri pamberi penyu.

¹⁶⁹Kudana kwangu ngakusvike pamberi penyu, Jehovha; Ndipei njere sezvinoreva shoko renyu.

¹⁷⁰Kukumbira kwangu ngakusvike pamberi penyu; Ndirwirei sezvinoreva shoko renyu.

¹⁷¹Miromo yangu ngairumbidze; Nokuti munondidzidzisa mitemo yenyu.

¹⁷²Rurimi rwangu ngaruimbe shoko renyu; Nokuti mirairo yenyu yose yakarurama.

¹⁷³Ruoko rwenyu ngarundibatsire; Nokuti ndakasanangura zvirevo zvenyu.

¹⁷⁴Ndakashuva kuponesa kwenyu, Jehovha; Murau wenyu ndiwo mufaro wangu mukuru.

¹⁷⁵Mweya wangu ngaurarame, ugokurumbidzai; Nezvamakatonga ngazvindibatsire.

¹⁷⁶Ndakadzungaira segwai rakarashika; tsvakai muranda wenyu; Nokuti handikanganwi mirairo yenyu.