Read Shona Union Version 2002 Mapisarema 132 Bible Online

Mapisarema 132 - Shona Union Version 2002 bible

Mapisarema 132

¹Rwiyo rworwendo. Jehovha, rangarirai Dhavhidhi Nedambudziko rake rose;

²Namapikiro ake kuna Jehovha, Nokupika kuna Wamasimba waJakobho, achiti,

³“Zvirokwazvo handingapindi mutende reimba yangu, Kana kukwira pamubhedha wandakawadzirwa;

⁴Handingatenderi meso angu kuvata, Kana mafungiro angu kukotsira;

⁵Kusvikira ndawanira Jehovha nzvimbo, Netabhenakeri dzaWamasimba waJakobho.”

⁶Tarirai, takazvinzwa muEfirata; Takazviwana pasango reJaari.

⁷Tichapinda mutabhenakeri dzake; Tichanamata pachitsiko chetsoka dzake.

⁸Simukai Jehovha, mupinde pamungazorora; Imi, neareka yesimba renyu.

⁹Vapristi venyu ngavafukidzwe nokururama; Uye vatsvene venyu ngavapururudze nomufaro.

¹⁰Nokuda kwaDhavhidhi muranda wenyu Regai kuramba chiso chomuzodziwa wenyu.

¹¹Jehovha akapika kuna Dhavhidhi; Haangashanduki pazviri, achiti, “Zvibereko zvomuviri wako ndizvo zvandichaisa pachigaro chako chohushe.

¹²Kana vana vako vachichengeta sungano yangu Nezvipupuriro zvangu zvandichavadzidzisa, Navana vavowo vachagara pachigaro chako choushe nokusingaperi.”

¹³Nokuti Jehovha wakasanangura Zioni; Akarida kuti huve ugaro hwake.

¹⁴Pano ndipo pandinozorora nokusingaperi; Ndichagara pano; nokuti ndakapada.

¹⁵Ndicharopafadza zvokudya zvaro kwazvo; Ndichagutisa varombo varo nezvokudya.

¹⁶Vapristi varo ndichavafukidzawo noruponeso; Vatsvene varo vachapururudza nomufaro.

¹⁷Ipapo ndichameresera Dhavhidhi runyanga; Ndakagadzirira muzodzwa wangu mwenje.

¹⁸Vavengi vake ndichavafukidza nokunyadziswa; Asi korona yake ichapenya pamusoro pake.