Read Shona Union Version 2002 Mapisarema 135 Bible Online

Mapisarema 135 - Shona Union Version 2002 bible

Mapisarema 135

¹Hareruya! Rumbidzai zita raJehovha; Murumbidzei, imi varanda vaJehovha;

²Imi mumire mumba maJehovha, Muvazhe dzeimba yaMwari wedu.

³Rumbidzai Jehovha; nokuti Jehovha akanaka; Imbirai zita rake nziyo dzokurumbidza; nokuti ndizvo zvinofadza.

⁴Nokuti Jehovha akazvisanangurira Jakobho, NaIsiraeri kuti ave pfuma yake chaiyo.

⁵Nokuti ndinoziva kuti Jehovha mukuru, Uye kuti Ishe wedu ari kumusoro kwavamwari vose.

⁶Zvose zvaakada kuita Jehovha akazviita, Kudenga napasi, nomumakungwa napakadzika pose.

⁷Anokwidza makore pamigumo yapasi; Anoita mheni kuuyisa mvura; Anobudisa mhepo panovigwa pfuma yake.

⁸Ndiye akaparadza matangwe eIjipiti, Avanhu neezvipfuwo.

⁹Akatuma zviratidzo nezvishamiso mukati mako, iwe Ijipiti, Pamusoro paFarao napamusoro pavaranda vake vose.

¹⁰Ndiye akaparadza ndudzi zhinji, Nokuuraya madzimambo anesimba.

¹¹Sihoni mambo wavaAmori, NaOgi mambo weBhashani, Noushe hwose hweKanani;

¹²Akapa nyika yavo ive nhaka, Ive nhaka yaIsiraeri vanhu vake.

¹³Zita renyu, Jehovha, riripo nokusingaperi; Munorangarirwa Jehovha, kusvikira kumarudzi namarudzi.

¹⁴Nokuti Jehovha achatonga vanhu vake, Nokuzvidemba pamusoro pavaranda vake.

¹⁵Zvifananidzo zvavahedheni isirivha nendarama, Mubato wamaoko avanhu.

¹⁶Zvinemiromo, asi hazvitauri; Nameso zvinawo, asi hazvioni;

¹⁷Zvinenzeve, asi hazvinzwi; Hakuna kufema pamiromo yazvo.

¹⁸Vanozviita vachafanana nazvo; Zvirokwazvo, navose vanovimba nazvo.

¹⁹Imi veimba yaIsiraeri, rumbidzai Jehovha; Imi veimba yaAroni, rumbidzai Jehovha;

²⁰Imi veimba yaRevhi, rumbidzai Jehovha; Imi vanotya Jehovha, rumbidzai Jehovha.

²¹Jehovha ngaarumbidzwe paZioni, Iye agere Jerusaremu. Hareruya!