Read Shona Union Version 2002 Mapisarema 136 Bible Online

Mapisarema 136 - Shona Union Version 2002 bible

Mapisarema 136

¹Vongai Jehovha, nokuti akanaka; Nokuti ngoni dzake dzinogara nokusingaperi.

²Vongai Mwari wavamwari; Nokuti ngoni dzake dzinogara nokusingaperi.

³Vongai Ishe wamadzishe; Nokuti ngoni dzake dzinogara nokusingaperi.

⁴Iye oga, anoita zvishamiso zvikuru; Nokuti ngoni dzake dzinogara nokusingaperi.

⁵Iye, akaita kudenga-denga nenjere dzake; Nokuti ngoni dzake dzinogara nokusingaperi.

⁶Iye akatatanura pasi pamusoro pemvura zhinji; Nokuti ngoni dzake dzinogara nokusingaperi.

⁷Iye akaita zviedza zvikuru; Nokuti ngoni dzake dzinogara nokusingaperi.

⁸Zuva, kuti ribate ushe masikati; Nokuti ngoni dzake dzinogara nokusingaperi.

⁹Mwedzi nenyeredzi, kuti zvibate ushe usiku; Nokuti ngoni dzake dzinogara nokusingaperi.

¹⁰Iye, akarova veIjipiti pamatangwe avo; Nokuti ngoni dzake dzinogara nokusingaperi.

¹¹Akabudisa Isiraeri pakati pavo; Nokuti ngoni dzake dzinogara nokusingaperi.

¹²Nechanza chine simba, uye noruoko rwakatambanudzwa; Nokuti ngoni dzake dzinogara nokusingaperi.

¹³Iye akaparadzanisa Gungwa Dzvuku napakati; Nokuti ngoni dzake dzinogara nokusingaperi.

¹⁴Akayambusa Isiraeri nomukati maro; Nokuti ngoni dzake dzinogara nokusingaperi.

¹⁵Akawisira Farao nehondo yake muGungwa Dzvuku; Nokuti ngoni dzake dzinogara nokusingaperi.

¹⁶Iye, akaperekedza vanhu vake murenje; Nokuti ngoni dzake dzinogara nokusingaperi.

¹⁷Iye, akaparadza madzimambo makuru; Nokuti ngoni dzake dzinogara nokusingaperi.

¹⁸Akauraya madzimambo akakurumbira; Nokuti ngoni dzake dzinogara nokusingaperi.

¹⁹Sihoni mambo wavaAmori; Nokuti ngoni dzake dzinogara nokusingaperi.

²⁰NaOgi mambo weBhashani; Nokuti ngoni dzake dzinogara nokusingaperi.

²¹Akapa nyika yavo ive nhaka; Nokuti ngoni dzake dzinogara nokusingaperi.

²²Ive nhaka yaIsiraeri muranda wake; Nokuti ngoni dzake dzinogara nokusingaperi.

²³Iye, akatirangarira paurombo hwedu; Nokuti ngoni dzake dzinogara nokusingaperi;

²⁴Akatirwira pavadzivisi vedu; Nokuti ngoni dzake dzinogara nokusingaperi.

²⁵Ndiye anopa zvinhu zvose zvokudya zvazvo; Nokuti ngoni dzake dzinogara nokusingaperi.

²⁶Vongai Mwari wokudenga; Nokuti ngoni dzake dzinogara nokusingaperi.