Read Shona Union Version 2002 Mapisarema 139 Bible Online

Mapisarema 139 - Shona Union Version 2002 bible

Mapisarema 139

¹Kumutungamiriri wokuimba. Pisarema raDhavhidhi. Jehovha, imi makandinzvera, nokundiziva.

²Munoziva kugara kwangu pasi nokusimuka kwangu, Munonzwisisa kufunga kwangu muri kure.

³Munocherekedza kufamba kwangu nokuvata kwangu pasi, Munoziva nzira dzangu dzose.

⁴Nokuti shoko risati ravapo parurimi rwangu, Tarirai, imi Jehovha, matoriziva rose.

⁵Makandikomberedza shure kwangu nemberi, Nokuisa ruoko rwenyu pamusoro pangu.

⁶Kuziva kwakadai kunondishamisa kwazvo; Zviri kumusoro, handigoni kusvikira kwazviri.

⁷Ndingaendepiko ndibve pamweya wenyu? Kana ndingatizirepiko ndibve pamberi penyu?

⁸Kana ndingakwira kudenga muripo; Kana ndikazviwarira nhoo paSheori, tarirai muripowo.

⁹Kana ndikabhururuka namapapiro amangwanani, Ndikandogara pamigumo yegungwa;

¹⁰Naipapowo ruoko rwenyu ruchandifambisa, Ruoko rwenyu rworudyi ruchandifambisa,

¹¹Kana ndikati, “Zvirokwazvo, rima richandifukidza,” Chiedza chinondikomberedza chichava sousiku;

¹²Kunyange rima haringandivanzi kwamuri, Asi usiku hunopenya samasikati; Rima nechiedza zvakafanana.

¹³Nokuti imi makaumba itsvo dzangu; Makandiruka mudumbu ramai vangu.

¹⁴Ndichakuvongai; nokuti ndakaitwa nomutoo unotyisa unoshamisa; Mabasa enyu anoshamisa; Mweya wangu unozviziva kwazvo.

¹⁵Mapfupa angu akanga asina kuvanzwa kwamuri, Panguva yandakaitwa pakavanda, Pakuumbwa kwangu nenjere panzvimbo dzezasi dzapasi.

¹⁶Meso enyu akaona muviri wangu uchigere kukwaniswa, Zvose zvakanga zvakanyorwa murugwaro rwenyu, Zuva rimwe nerimwe rokuumbwa kwazvo, Kusati kwava nechimwe chazvo.

¹⁷Mirangariro yenyu, Mwari, inodikanwa sei nei! Yakakura sei pakuverengwa kwayo!

¹⁸Kana ndikaiverenga, ingapfuura jecha pakuwanda; Kana ndichipepuka, ndichinemi.

¹⁹Dai muchiuraya henyu vakaipa, Mwari; Naizvozvo ibvai kwandiri, imi vanhu veropa.

²⁰Nokuti vanokutaurirai zvakaipa, Vavengi venyu vanoreva zita renyu pasina.

²¹Ko ini handivengi avo vanokuvengai here, Jehovha? Handine shungu here navanokumukirai?

²²Ndinovavenga nembengo huru; Vava vavengi vangu.

²³Ndinzverei, Mwari, muzive mwoyo wangu; Ndiidzei, muzive ndangariro dzangu;

²⁴Mutarire kana panenzira yakaipa mandiri, Mundifambise munzira isingaperi.