Read Shona Union Version 2002 Mapisarema 140 Bible Online

Mapisarema 140 - Shona Union Version 2002 bible

Mapisarema 140

¹Kumutungamiriri wokuimba. Pisarema raDhavhidhi. Ndirwirei Jehovha, pamunhu wakaipa; Ndichengetei pamunhu anehasha;

²Ivo, vanofunga zvakaipa mumwoyo yavo; Vanogara vachimutsa kurwa.

³Vakarodza rurimi rwavo senyoka; Uturu hwechiva huri pasi pemiromo yavo.

⁴Ndichengetei, Jehovha, pamaoko owakaipa; Ndichengetei pamunhu anomanikidza; Vanofunga mano okugumburisa tsoka dzangu.

⁵Vanozvikudza vakandivanzira musungo namabote; Vakadzika mumbure parutivi rwenzira, Vakanditeyera rugombe.

⁶Ndakati kuna Jehovha, “Ndimi Mwari wangu;” Teererai, Jehovha, munzwe izwi rokukumbira kwangu.

⁷Mwari Ishe, ndimi simba rokuponeswa kwangu, Makafukidza musoro wangu pazuva rokurwa.

⁸Jehovha, regai kupa wakaipa zvaanotsvaka; Musapfuudza zano rake rakaipa; kuti varege kuzvikudza.

⁹Kana uri musoro wavanondikomba, Zvakashata zvemiromo yavo imene ngazvivafukidze.

¹⁰Mazimbe omoto, anopfuta, ngaawire pamusoro pavo; Ngavakandirwe mumoto; Nomumakomba akadzika, kuti varege kumukazve.

¹¹Munhu, anamakuhwa, haangasimbiswi pasi; Zvakaipa zvichavhima munhu anomanikidza kuti zvimuparadze.

¹²Ndinoziva kuti Jehovha achagadzira mhosva yavanotambudzika, Nokururamisira vashaiwi.

¹³Zvirokwazvo, vakarurama vachavonga zita renyu; Vanemwoyo yakarurama vachagara pamberi penyu.