Read Shona Union Version 2002 Mapisarema 145 Bible Online

Mapisarema 145 - Shona Union Version 2002 bible

Mapisarema 145

¹Pisarema rokurumbidza; raDhavhidhi. Ndichakukudzai kwazvo, Mwari wangu, imi Mambo; Ndicharumbidza zita renyu nokusingaperi-peri.

²Ndichakurumbidzai zuva rimwe nerimwe; Ndichakudza zita renyu nokusingaperi-peri.

³Jehovha mukuru, anofanira kurumbidzwa kwazvo; Ukuru hwake haunganzverwi.

⁴Rudzi rumwe rucharumbidza mabasa enyu kuno rumwe, Vachadudzira zvamakaita zvine simba.

⁵Ndichafungisisa kubwinya kwoumambo hwenyu hunokudzwa, Namabasa enyu anoshamisa.

⁶Vanhu vachataura vachireva simba ramabasa enyu anotyisa; Neni ndichadudzira ukuru hwenyu.

⁷Vachareva vachiyeudzira kunaka kwenyu kukuru, Nokuimbira kururama kwenyu.

⁸Jehovha anenyasha, azere netsitsi, Haachimbidziki kutsamwa, anengoni zhinji.

⁹Jehovha anomwoyo wakanaka kuna vose; Ngoni dzake dziri pamabasa ake ose.

¹⁰Mabasa enyu ose achakuvongai Jehovha; Navatsvene venyu vachakurumbidzai.

¹¹Vachataura vachireva kubwinya kwoushe hwenyu, Nokuparidza simba renyu;

¹²Kuti vazivise vanakomana vavanhu mabasa ake anesimba, Nokubwinya kwoumambo hwohushe hwake.

¹³Ushe hwenyu ndihwo ushe husingaperi, Noumambo hwenyu huchagara nokusingaperi.

¹⁴Jehovha anotsigira vose vanowa, Anosimudza vose vakakotamiswa pasi.

¹⁵Meso avose anotarira kwamuri; Munovapa zvokudya zvavo panguva yakafanira.

¹⁶Munotadzanura ruoko rwenyu, Ndokugutisa zvipenyu zvose.

¹⁷Jehovha akarurama panzira dzake dzose, Anenyasha pazvose zvaanoita.

¹⁸Jehovha ari pedyo navose vanodana kwaari, Vose vanodana kwaari nezvokwadi.

¹⁹Achaitira vanomutya sezvavanoda; Achanzwawo kudanidzira kwavo; ndokuvaponesa.

²⁰Jehovha anochengeta vose vanomuda; Asi vakaipa achavaparadza vose.

²¹Muromo wangu uchataura kurumbidzwa kwaJehovha; Vanhu vose ngavarumbidze zita rake dzvene nokusingaperi-peri.