Read Shona Union Version 2002 Mapisarema 147 Bible Online

Mapisarema 147 - Shona Union Version 2002 bible

Mapisarema 147

¹Hareruya! Nokuti zvakanaka kuti Mwari wedu aimbirwe nziyo dzokurumbidza; Zvinofadza, uye kurumbidza kwakafanira.

²Jehovha anovaka Jerusaremu; Anounganidza vakadzingwa vaIsiraeri.

³Anoporesa vane mwoyo yakaputsika, Anosunga mavanga avo.

⁴Anotara kuwanda kwenyeredzi; Anodzipa dzose mazita adzo.

⁵Ishe wedu mukuru, anesimba guru; Njere dzake hadziperi.

⁶Jehovha anobatsira vanyoro; Vakaipa anovawisira pasi.

⁷Imbirai Jehovha muchimuvonga, Imbirai Mwari wedu nziyo dzokurumbidza nembira;

⁸Iye anofukidza denga namakore, Anogadzirira pasi mvura, Anomeresa uswa pamakomo.

⁹Anapa zvipfuwo zvokudya zvazvo, Navana vamakunguo, anochema.

¹⁰Haafadzwi nesimba rebhiza; Haafariri makumbo omurume.

¹¹Jehovha anofara navanomutya, Navanotarira ngoni dzake.

¹²Rumbidza Jehovha, iwe Jerusaremu; Rumbidza Mwari wako, iwe Zioni.

¹³Nokuti wakasimbisa mazarira amasuo ako; Akaropafadza vana vako mukati mako.

¹⁴Anoisa rugare panyika yako; Anokugutisa nezviyo zvakaisvonaka.

¹⁵Anotuma mirairo yake panyika; Shoko rake rinomhanya kwazvo.

¹⁶Anopa vanhu chando samakushe amakwai, Anoparadzira chando samadota.

¹⁷Anokanda chimvuramabwe chake sezvimedu; Ndianiko angamira pachando chake?

¹⁸Anotuma shoko rake, ndokuzvinyausa; Anovhuvhutisa mhepo yake mvura ndokuyerera.

¹⁹Anozivisa Jakobho shoko rake, NaIsiraeri mitemo yake nezvaakatonga.

²⁰Haana kutongoitira rumwe rudzi saizvozvo; Kana zviri zvaakatonga, havana kuzviziva. Hareruya!