Read Shona Union Version 2002 Mapisarema 148 Bible Online

Mapisarema 148 - Shona Union Version 2002 bible

Mapisarema 148

¹Hareruya! Rumbidzai Jehovha, imi muri kudenga; Murumbidzei panzvimbo dzokumusoro.

²Murumbidzei imi vatumwa vake vose; Murumbidzei imi hondo dzake dzose.

³Murumbidzei imi zuva nomwedzi; Murumbidzei imi nyeredzi dzose dzinovhenekera.

⁴Murumbidzei imi kudenga kwokudenga-denga, Newe mvura zhinji, iri kumusoro kwokudenga-denga.

⁵Ngazvirumbidze zita raJehovha; Nokuti iye akaraira, zvikasikwa.

⁶Akazvisimbisawo nokusingaperi-peri; Akatema chirevo chisingafaniri kudarikwa.

⁷Rumbidzai Jehovha imi vapasi, Imi zvikara zvegungwa, nezviri makadzika;

⁸Moto nechimvuramabwe, chando noutsi; Dutu guru, rinoita zvaakareva;

⁹Makomo nezvikomo zvose; Miti inobereka nemisidhari yose;

¹⁰Mhuka, nezvipfuwo zvose; Zvinokambaira neshiri dzinobhururuka;

¹¹Madzimambo apasi nendudzi dzose dzavanhu; Machinda navatongi vose vapasi;

¹²Majaya nemhandara; Vatana navana;

¹³Ngavarumbidze zita raJehovha; Nokuti zita rake roga rakakurumbira; Umambo hwake huri kumusoro kwapasi nokudenga.

¹⁴Akasimudza runyanga rwavanhu vake, Kuti arumbidzwe navatsvene vake vose; Naivo vana vaIsiraeri, ivo vanhu vari pedyo naye. Hareruya!