Read Shona Union Version 2002 Mapisarema 21 Bible Online

Mapisarema 21 - Shona Union Version 2002 bible

Mapisarema 21

¹Kumutungamiriri wokuimba. Pisarema raDhavhidhi. Mambo uchafara nesimba renyu, Jehovha; Achafarira kuponesa kwenyu zvikuru sei!

²Makamupa zvakadikanwa nomwoyo wake, Hamuna kuramba kukumbira kwemiromo yake.

³Nokuti munomuchingura nemikomborero yezvakanaka; Munodzika korona yendarama yakaisvonaka pamusoro wake.

⁴Akakumbira upenyu kwamuri, mukamupa ihwo; Namazuva mazhinji nokusingaperi-peri.

⁵Kurumbidzwa kwake kukuru nokuda kwokuponesa kwenyu, Makaisa pamusoro pake kukudzwa noumambo.

⁶Nokuti munomukomborera zvikuru nokusingaperi; Munomufadza nomufaro pamberi penyu.

⁷Nokuti mambo anovimba naJehovha, Nounyoro hoWokumusorosoro haangazunguswi.

⁸Ruoko rwenyu ruchawana vavengi venyu vose; Ruoko rwenyu rworudyi ruchawana vose vanokuvengai.

⁹Muchavaita sevira romoto nenguva yokutsamwa kwenyu. Jehovha achavamedza nehasha dzake, Moto uchavaparadza.

¹⁰Muchaparadza zvibereko zvavo panyika, Navana vavo pakati pavana vavanhu.

¹¹Nokuti vakafunga kukuitirai zvakaipa; Vakafunga zano rakaipa, asi havagoni kuzviita.

¹²Nokuti muchavafuratidza, Muchagadzira ungiso dzouta hwenyu kuvapfura pazviso zvavo.

¹³Simukai Jehovha, nesimba renyu; Naizvozvo tichaimba nokukudza chikuriri chenyu.