Read Shona Union Version 2002 Mapisarema 22 Bible Online

Mapisarema 22 - Shona Union Version 2002 bible

Mapisarema 22

¹Kumutungamiriri wokuimba; nomuimbirwo weAjereti Hashishahari. Pisarema raDhavhidhi. Mwari wangu, Mwari wangu, mandisiyireiko? Munomirireiko kure pakundibatsira, napamashoko okugomba kwangu?

²Mwari wangu, ndinodana masikati, asi hamupinduri; Nousiku, asi handiwani zororo.

³Asi imi muri mutsvene, Imi mugere parumbidzo dzaIsiraeri.

⁴Madzibaba edu akavimba nemi; Vakavimba, imi mukavarwira.

⁵Vakachema kwamuri, vakarwirwa; Vakavimba nemi, vakasanyadziswa.

⁶Asi ini ndiri honye, handizi munhu; Ndiri chinhu chinozvidzwa navanhu, chinoshorwa navanhu vose.

⁷Vose, vanondiona vanondiseka; Vanoshamisa muromo, vanodzungudza misoro, vachiti,

⁸“Chizviisai kuna Jehovha; iye ngaamurwire; Ngamurwire, zvaanomufarira iye.”

⁹Asi ndimi makandibudisa pachizvaro; Makandivimbisa nemi ndichiri pamazamu amai vangu.

¹⁰Ndakaiswa kwamuri kubva pachizvaro; Imi muri Mwari wangu kubva padumbu ramai vangu.

¹¹Regai kuva kure neni; nokuti njodzi iri pedyo; Nokuti hapana angabatsira.

¹²Hondo zhinji dzakandikomba; Hondo dzine simba dzaBhashani dzakandipoteredza.

¹³Dzinondishamisira miromo yadzo, Seshumba inoparadza ichiomba.

¹⁴Ndakadururwa semvura, Mapfupa angu ose akasvodogoka; Mwoyo wangu wakafanana nenamo; Wakanyauka mukati mohura hwangu.

¹⁵Simba rangu rakaoma sechaenga; Rurimi rwangu rwakanamatira pashana dzangu; Makandiisa paguruva rorufu.

¹⁶Nokuti imbwa dzakandikomberedza; Ungano yavanoita zvakaipa yakandipoteredza; Vakaboora maoko angu namakumbo angu;

¹⁷Ndingaverenga mapfupa angu ose; Vanonditarira nokundinanganidza;

¹⁸Vanogovana nguo dzangu pakati pavo, Vanokanda mijenya pamusoro pehanzu yangu.

¹⁹Asi imi Jehovha, regai kuva kure neni; Imi simba rangu, kurumidzai kundibatsira.

²⁰Rwirai mweya wangu pamunondo; Mudikanwa wangu pasimba rembwa.

²¹Ndiponesei pamuromo weshumba; Zvirokwazvo, makandipindura ndiri pakati penyanga dzenyati.

²²Ndichadudzira zita renyu kuhama dzangu; Ndichakurumbidzai pakati peungano.

²³Imi munotya Jehovha, murumbidzei; Imi mose vana vaJakobho, mukudzei; Mumutyei, imi mose vana vaIsiraeri.

²⁴Nokuti haana kuzvidza kana kusema dambudziko raanotambudzwa; Kana kumuvanzira chiso chake; Asi panguva yaakachema kwaari akamunzwa.

²⁵Kurumbidza kwangu paungano huru kunobva kwamuri; Ndicharipa mhiko dzangu pamberi pavanomutya.

²⁶Vanyoro vachadya vakaguta; Vanotsvaka Jehovha ndivo vachamurumbidza; Mwoyo yenyu ngairarame nokusingaperi.

²⁷Migumo yose yenyika icharangarira nokudzokera kuna Jehovha; Marudzi ose avahedheni achanamata kwamuri.

²⁸Nokuti ushe ndohwaJehovha; Ndiye mubati wavahedheni.

²⁹Vakuru vose venyika vachadya nokunamata; Vose vanoburukira kuguruva vachapfugama pamberi pake, Naiye asingagoni kuraramisa mweya wake.

³⁰Vana vake vachanamata kwaari; Rudzi runotevera ruchaudzwa zvaJehovha.

³¹Vachauya vachidudzira kururama kwake Kuvanhu vachazozvarwa, kuti ndiye wakazviita.