Read Shona Union Version 2002 Mapisarema 25 Bible Online

Mapisarema 25 - Shona Union Version 2002 bible

Mapisarema 25

¹Pisarema raDhavhidhi. Jehovha, ndinosimudzira mwoyo wangu kwamuri.

²Mwari wangu, ndinovimba nemi, Ngandirege kunyadziswa; Vavengi vangu ngavarege kundikunda.

³Zvirokwazvo, hapana munhu anokumirirai anganyadziswa; Vachanyadziswa ndivo vanonyengera pasina chinhu.

⁴Ndiratidzei nzira dzenyu, Jehovha; Ndidzidzisei nzira dzenyu.

⁵Ndiperekedzei muzvokwadi yenyu, mundidzidzise; Nokuti ndimi Mwari muponesi wangu; Ndinokutarirai zuva rose.

⁶Rangarirai, Jehovha, nyasha yenyu huru nounyoro hwenyu; Nokuti zvaivapo kare nakare.

⁷Regai kurangarira zvivi zvohuduku hwangu, nokudarika kwangu; Mundirangarire nounyoro hwenyu, Nokuda kwokunaka kwenyu, Jehovha.

⁸Jehovha akanaka, akarurama; Saka acharaira vatadzi panzira.

⁹Achaperekedza vanyoro munezvakarurama; Achadzidzisa vanyoro nzira yake.

¹⁰Nzira dzose dzaJehovha ndedzounyoro nezvokwadi Kunavanochengeta sungano yake nezvipupuriro zvake.

¹¹Nokuda kwezita renyu, Jehovha, Kanganwirai zvakaipa zvangu, nokuti zvikuru.

¹²Munhu ndoupiko anotya Jehovha? Ndiye waachadzidzisa nzira yaanofanira kusanangura.

¹³Mweya wake uchagara zvakanaka; Uye vana vake vachagara nhaka yenyika.

¹⁴Zvakavanzwa zvaJehovha ndezvavanomutya; Achavaratidza sungano yake.

¹⁵Meso angu anoramba achitarira kuna Jehovha; Nokuti anobvisa tsoka dzangu pamumbure.

¹⁶Ringirai kwandiri, mundinzwire nyasha; Nokuti ndiri ndoga, ndinotambudzika.

¹⁷Madambudziko omwoyo wangu awanda kwazvo; Haiwa, ndibudisei panjodzi dzangu.

¹⁸Tarirai kutambudzika kwangu nokurwadziwa kwangu; Mundikanganwire zvivi zvangu zvose.

¹⁹Tarirai vavengi vangu, nokuti vazhinji; Vanondivenga nehasha dzembengo.

²⁰Chengetai mweya wangu mundirwire; Ndirege kunyadziswa, nokuti ndinovimba nemi.

²¹Kusanyengera nokururama ngazvindichengete, Nokuti ndinokumirirai.

²²Dzikinurai Isiraeri, imi Mwari, Panjodzi dzake dzose.