Read Shona Union Version 2002 Mapisarema 27 Bible Online

Mapisarema 27 - Shona Union Version 2002 bible

Mapisarema 27

¹Pisarema raDhavhidhi. Jehovha ndiye chiedza changu noMuponesi wangu; ndingagotya aniko? Jehovha ndiye simba roupenyu hwangu; ndingagovhunduswa naniko?

²Vaiti vezvakaipa vakati vachiuya kwandiri kuzodya nyama yangu, Ivo vadzivisi vangu navavengi vangu, vakagumburwa vakawa.

³Kunyange hondo ikandikomba, Mwoyo wangu haungatyi; Kunyange ndikavingwa nokurwa, Nenguva iyo ndichavimba naJehovha.

⁴Chinhu chimwechete ndakakumbira kuna Jehovha, ndicho chandichatsvaka; Kuti ndigare mumba maJehovha misi yose youpenyu hwangu, Kuti ndione kunaka kwaJehovha, nokurangarira mutemberi yake.

⁵Nokuti nomusi wenjodzi anondiviga mudumba rake, Uchandivanza pakavanda patende rake; Uchandikwiridza padombo.

⁶Zvino musoro wangu uchasimudzirwa kumusoro kwavavengi vangu vanondikomba; Ndichamubayira zvibayiro zvomufaro patende rake. Ndichaimba, zvirokwazvo ndichaimbira Jehovha nziyo dzokumurumbidza.

⁷Inzwai Jehovha, kana ndichidana nezwi rangu; Ndinzwirei tsitsi, mundipindure.

⁸Panguva yamakati, “Tsvakai chiso changu;” mwoyo wakati kwamuri, “Chiso chenyu, Jehovha, ndichachitsvaka.”

⁹Regai kundivanzira chiso chenyu; Musadzinga muranda wenyu pakutsamwa kwenyu; Makanga muri mubatsiri wangu; Regai kundirasha, kana kundisiya, imi Mwari muponesi wangu.

¹⁰Nokuti baba vangu namai vangu vakandirasha, Asi Jehovha achandigamuchira.

¹¹Ndidzidzisei nzira yenyu Jehovha; Mundifambise panzira yakati chechetere, Nokuda kwavanondivandira.

¹²Musandisundira pakuda kwavadzivisi vangu; Nokuti zvapupu zvenhema zvakandimukira, navanofemereka hasha.

¹³Ndingadai ndakafa hangu, kana ndisina kutenda kuti ndichaona kunaka kwaJehovha. Panyika yavapenyu.

¹⁴Rindira Jehovha; Iva nesimba, nomwoyo wako utsunge; Ndinoti, rindira Jehovha.