Read Shona Union Version 2002 Mapisarema 28 Bible Online

Mapisarema 28 - Shona Union Version 2002 bible

Mapisarema 28

¹Pisarema raDhavhidhi. Ndichadana kwamuri, Jehovha; Dombo rangu, regai kundinyararira; Zvimwe, kana mukandinyararira, Ndingafanana navanoburukira kugomba.

²Inzwai izwi remikumbiro yangu, kana ndichichema kwamuri, Kana ndichisimudzira maoko angu kunzvimbo yomukati yeimba yenyu tsvene.

³Musandibvuta pamwechete navakaipa, Navanoita zvakashata; Ivo vanotaura rugare kuna vavanogara navo, Asi zvakashata zviri mumwoyo mavo.

⁴Muvape zvakaenzana nebasa ravo, uye zvakaenzana nezvakaipa zvavakaita, Muvape zvakaenzana nokubata kwamaoko avo; Muvaitire sezvakavafanira.

⁵Zvavasina kurangarira mabasa aJehovha, Nezvaakabata namaoko ake, Iye achavaputsa, akasavavakazve.

⁶Jehovha ngaavongwe, Nokuti akanzwa izwi rokukumbira kwangu.

⁷Jehovha ndiye simba rangu nenhoo yangu; Mwoyo wangu wakavimba naye, ndikabatsirwa; Saka mwoyo wangu unofara kwazvo, Ndichamurumbidza norwiyo rwangu.

⁸Jehovha ndiye simba ravo, Ndiye nhare yokuponesa kumuzodziwa wake.

⁹Ponesai vanhu venyu, muropafadze nhaka yenyu; Muvafudzewo, muvatakure nokusingaperi.