Read Shona Union Version 2002 Mapisarema 29 Bible Online

Mapisarema 29 - Shona Union Version 2002 bible

Mapisarema 29

¹Ipai, Jehovha, imi vanakomana vaMwari, Ipai Jehovha kudzo nesimba.

²Ipai Jehovha kudzo yakafanirwa nezita rake; Namatai kuna Jehovha nenguo tsvene.

³Izwi raJehovha riri pamusoro pemvura zhinji; Mwari wokubwinya unotinhira, Iye Jehovha ari pamusoro pemvura zhinji-zhinji,

⁴Izwi raJehovha rine simba; Izwi raJehovha rizere noumambo.

⁵Izwi raJehovha rinovhuna misidhari; Zvirokwazvo, Jehovha anovhunanya misidhari yeRebhanoni.

⁶Anoipemberesa semhuru; Iro Rebhanoni neSirioni semhuru yenyati.

⁷Izwi raJehovha rinopamura mirazvo yomoto.

⁸Izwi raJehovha rinodederesa renje; Jehovha anodederesa renje reKadheshi.

⁹Izwi raJehovha rinoberekesa nondo, Rinosvuura miti yamatondo; Nomutemberi yake zvose zvinoti, “Kubwinya.”

¹⁰Jehovha akagara pachigaro chohushe paboporodzi remvura; Zvirokwazvo, Jehovha anogara ari mambo nokusingaperi.

¹¹Jehovha achapa vanhu vake simba; Jehovha acharopafadza vanhu vake norugare.