Read Shona Union Version 2002 Mapisarema 30 Bible Online

Mapisarema 30 - Shona Union Version 2002 bible

Mapisarema 30

¹Pisarema; rwiyo pakutsaurira Jehovha imba; Pisarema raDhavhidhi. Ndichakukudzai zvikuru, Jehovha; nokuti makandisimudza, Hamuna kutendera vavengi vangu kufara nokuda kwangu.

²Jehovha, Mwari wangu, Ndakachema kwamuri, imi mukandiponesa.

³Jehovha, makabudisa mweya wangu paSheori; Makachengeta upenyu hwangu, kuti ndirege kuburukira kugomba.

⁴Imbirai Jehovha nziyo dzokurumbidza, imi vatsvene vake, Muvonge kana muchirangarira zita rake dzvene.

⁵Nokuti kutsamwa kwake kuripo chinguva chiduku; Asi ngoni dzake ndedzoupenyu hwose. Kuchema kungavapo madekwana, Asi mufaro unosvika mangwanani.

⁶Kana ndirini, ndakati pakufara kwangu, “Handingatongozununguswi.”

⁷Imi Jehovha, nengoni dzenyu makamisa gomo rangu nesimba; Makavanza chiso chenyu; ini ndikatambudzika.

⁸Ndakachema kwamuri, Jehovha; Uye ndakakumbira kuna Jehovha;

⁹“Ropa rangu ringandibatsireiko, kana ndichaburukira kugomba? Guruva ringakurumbidzai here? Ringadudzira zvokwadi yenyu here?

¹⁰Inzwai Jehovha, mundinzwirei tsitsi; Jehovha, ivai mubatsiri wangu.”

¹¹Makashandura kuchema kwangu kukava kutamba; Makasunungura gumbo rangu, mukasunga chiuno changu nomufaro;

¹²Kuti mweya wangu ukuimbirei nziyo dzokurumbidza, urege kunyarara. Jehovha Mwari wangu, ndichakuvongai nokusingaperi.