Read Shona Union Version 2002 Mapisarema 31 Bible Online

Mapisarema 31 - Shona Union Version 2002 bible

Mapisarema 31

¹Kumutungamiriri wokuimba. Pisarema raDhavhidhi. Jehovha, ndinovimba nemi; ngandirege kutongonyadziswa; Ndirwirei pakururama kwenyu.

²Rerekerai nzeve yenyu kwandiri; kurumidzai kundirwira; Ivai dombo rangu rakasimba, neimba yenhare yokundiponesa.

³Nokuti ndimi dombo rangu nenhare yangu; Naizvozvo nditungamirirei mundifambise nokuda kwezita renyu.

⁴Ndibvutei pamumbure wavakandidzikira pakavanda; Nokuti ndimi nhare yangu.

⁵Ndinoisa mweya wangu muruoko rwenyu; Makandidzikinura Jehovha, imi Mwari wazvokwadi.

⁶Ndinovenga vanokudza zvenhema zvisina maturo; Asi ndichavimba naJehovha.

⁷Ndichafara nokufarisisa netsitsi dzenyu; Nokuti makaona kutambudzika kwangu; Makaziva kumanikidzwa kwomweya wangu;

⁸Hamuna kundiisa muruoko rwomuvengi; Makamisa tsoka dzangu panzvimbo yakafarikana.

⁹Ndinzwirei tsitsi Jehovha, nokuti ndiri panjodzi; Ziso rangu rapera nokuchema, zvirokwazvo, nomweya wangu nomuviri wanguo.

¹⁰Nokuti hupenyu hwangu hwapera nokuchema, namakore angu nokugomera; Simba rangu rapera nokuda kwokutadza kwangu, uye mapfupa angu asakara.

¹¹Ndava chinhu chinozvidzwa nemhaka yavadzivisi vangu vose, Zvirokwazvo, zvikuru kuna vandinogara navo, nechinotyisa kuvazikani vangu; Vakandiona kunze vakanditiza.

¹²Ndakanganikwa sowakafa asati achafungwa; Ndava somudziyo wakaputsika.

¹³Ndakanzwa vazhinji vachindipomera, Zvinotyisa kumativi ose; Pakurangana kwavo pamusoro pangu Vakafunga mano kuti vanditorere upenyu hwangu.

¹⁴Asi ndakavimba nemi Jehovha; Ndakati, “Ndimi Mwari wangu.”

¹⁵Nguva dzangu dziri muruoko rwenyu; Ndirwirei paruoko rwavavengi vangu, nokuna vanonditambudza.

¹⁶Vhenekesai chiso chenyu pamusoro pomuranda wenyu; Ndiponesei nounyoro hwenyu.

¹⁷Ngandirege kunyadziswa, Jehovha; nokuti ndakadana kwamuri; Vakaipa ngavanyadziswe, ngavanyarare paSheori.

¹⁸Miromo inoreva nhema ngainyarare; Iyo inotaura namanyawi kuna vakarurama, Ichizvikudza nokuvazvidza.

¹⁹Haiwa, zvakanaka zvenyu zvamakachengetera vanokutyai zvakakura sei, Zvamakaitira vanovimba nemi, pamberi pavanakomana vavanhu!

²⁰Muchavavanza pakavanda pamberi penyu, vabve pamano avanhu; Muchavachengeta pakavanda patende vabve panharo dzendimi.

²¹Jehovha ngaavongwe, Nokuti akandiratidza unyoro hwake hunoshamisa paguta rakasimba.

²²Kana ndirini, ndakati pakukaruka kwangu, “Ndabviswa pamberi penyu;” Kunyange zvakadaro, makanzwa izwi rokukumbira kwangu pakuchema kwangu kwamuri.

²³Idai Jehovha, imi vatsvene vake mose; Jehovha anochengeta vakatendeka, Anotsiva zvikuru munhu anozvikudza.

²⁴Ivai nesimba, uye mwoyo yenyu itsunge, Imi mose munorindira Jehovha.