Read Shona Union Version 2002 Mapisarema 32 Bible Online

Mapisarema 32 - Shona Union Version 2002 bible

Mapisarema 32

¹Pisarema raDhavhidhi. Rwiyo rweMashiri. Akakomborerwa akakanganwirwa kudarika kwake, akafukidzirwa zvivi zvake.

²Akakomborerwa munhu asingaverengerwi zvakaipa naJehovha; asina kunyengera pamweya wake.

³Panguva yandakaramba ndinyerere, mapfupa angu akasakara Nokuuura kwangu zuva rose.

⁴Nokuti ruoko rwenyu rwakanga ruchirema pamusoro pangu masikati nousiku; Unyoro hwangu hwakashandurwa hukava kuoma kwechirimo.

⁵Ndakakuzivisai chivi changu, handina kuvanza chakaipa changu; Ndakati, “Ndichazvireurura kudarika kwangu kuna Jehovha;” Imi mukandikanganwira kuipa kwechivi changu.

⁶Saka vose vanotya Mwari ngavanyengetere kwamuri panguva yamungawanikwa; Zvirokwazvo kana mvura zhinji ichikukura, haingasviki kwaari.

⁷Ndimi chivando changu; muchandichengeta ndirege kuwira pakutambudzika. Muchandikomberedza nenziyo dzokurwirwa.

⁸Ndichakudzidzisa nokukuraira nzira yaunofanira kufamba nayo; Ndichakupa njere neziso rangu, riri pamusoro pako.

⁹Regai kuva sebhiza, kana sehesera, zvisinganzwisisi; Zvinofanira kufambiswa norwauro netomu pamakashu azvo, Hazvingazodi kuswedera kwauri.

¹⁰Akaipa achava nenjodzi zhinji; Asi anovimba naJehovha achakombwa netsitsi.

¹¹Farai munaJehovha, mufarisise, imi makarurama; Pururudzai nomufaro, imi mose makarurama pamwoyo.