Read Shona Union Version 2002 Mapisarema 33 Bible Online

Mapisarema 33 - Shona Union Version 2002 bible

Mapisarema 33

¹Farisai munaJehovha, imi vakarurama; Kurumbidza kwakafanira vakarurama.

²Vongai Jehovha nembira; Muimbirei nziyo dzokurumbidza nomutengeranwa une hungiso dzine gumi.

³Muimbirei rwiyo rutsva; Ridzai zvakanaka nokuridza kukuru.

⁴Nokuti shoko raJehovha rakarurama, Anoita zvose nokutendeka.

⁵Iye anoda kururama nokururamisa; Nyika izere nounyoro hwaJehovha.

⁶Kudenga-denga kwakaitwa neshoko raJehovha, Uye hondo dzose dzoko nokufema kwomuromo wake.

⁷Anounganidza mvura zhinji yegungwa pamwechete somurwi; Anochengeta mvura zhinji dzakadzika mumatura.

⁸Nyika yose ngaitye Jehovha; Vose vagere panyika ngavadedere pamberi pake.

⁹Nokuti iye akataura, zvikaitika; Akaraira, zvikamira zvikasimba.

¹⁰Jehovha anoparadza zano ravahedheni; Mifungo yendudzi dzavanhu anoishaisa simba.

¹¹Zano raJehovha rakasimba nokusingaperi, Nendangariro dzomwoyo wake kusvikira kundudzi dzose.

¹²Rwakakomborerwa rudzi rwakaita Jehovha Mwari warwo; Rudzi rwaakatsaura kuva nhaka yake.

¹³Jehovha anotarira ari kudenga; Anoona vanakomana vose vavanhu;

¹⁴Anotarira ari ipapo paagere Achiona vanhu vose vagere panyika.

¹⁵Iye anoumba mwoyo yavo vose, Anocherekedza mabasa avo ose

¹⁶Hapana mambo anoponeswa nokuwanda kwehondo; Mhare hairwirwi nesimba guru.

¹⁷Bhiza haribatsiri pakukunda; Harigoni kurwira nesimba raro guru.

¹⁸Tarirai, ziso raJehovha rinotarira vanomutya, Ivo, vanorindira tsitsi dzake;

¹⁹Kurwira mweya wavo parufu, Nokuvararamisa panguva yenzara.

²⁰Mweya yedu yakarindira Jehovha; Ndiye mubatsiri wedu nenhoo yedu.

²¹Nokuti mwoyo yedu ichafara kwazvo maari, Zvatakavimba nezita rake dzvene.

²²Tsitsi dzenyu ngadzive nesu, Jehovha, Sezvatakakurindirai.