Read Shona Union Version 2002 Mapisarema 34 Bible Online

Mapisarema 34 - Shona Union Version 2002 bible

Mapisarema 34

¹Pisarema raDhavhidhi, panguva yaakazviita benzi pamberi paAbhimereki, akadzingwa naye, akaenda hake. Ndicharumbidza Jehovha nguva dzose; Rumbidzo yake ichagara mumuromo mangu.

²Mweya wangu uchazvirumbidza muna Jehovha; Vanyoro vachazvinzwa, vakafara.

³Kudzai Jehovha pamwechete neni, Ngatikudzise zita rake pamwechete.

⁴Ndakatsvaka Jehovha, akandipindura, Akandisunungura pakutya kwangu kwose.

⁵Vakatarira kwaari, vakapenyeswa nomufaro; Zviso zvavo hazvingatongonyadziswi.

⁶Murombo uyu akachema, Jehovha akamunzwa, Akamuponesa panjodzi dzake dzose.

⁷Mutumwa waJehovha anokomberedza vanomutya, Nokuvarwira.

⁸Ravirai henyu, muone kuti Jehovha wakanaka; Akakomborerwa munhu anovimba naye.

⁹Ityai Jehovha, imi vatsvene vake; Nokuti vanomutya havana chavanoshaiwa.

¹⁰Vana veshumba vanoshaiwa, vanofa nenzara; Asi vanotsvaka Jehovha havana chinhu chakanaka chavangashaiwa.

¹¹Uyai imi vana, munditeerere; Ndichakudzidzisai kutya Jehovha.

¹²Ndoupi munhu anoda upenyu, Anoda mazuva mazhinji, kuti aone zvakanaka?

¹³Dzora rurimi rwako pakutaura zvakaipa, Nemiromo yako, urege kutaura zvinonyengera.

¹⁴Ibva pane zvakaipa uite zvakanaka; Tsvaka rugare, urutevere.

¹⁵Meso aJehovha anotarira vakarurama, Uye nzeve dzake dzinonzwa kuchema kwavo.

¹⁶Chiso chaJehovha chinovenga vanoita zvakaipa, Kuti abvise chiyeudziro chavo panyika.

¹⁷Vakarurama vakadana, Jehovha akanzwa, Akavarwira panjodzi dzavo dzose.

¹⁸Jehovha ari pedyo navane mwoyo yakaputsika, Anoponesa vane mweya yakapwanyika.

¹⁹Akarurama anamadambudziko mazhinji; Asi Jehovha anomurwira abude paari ose.

²⁰Anochengeta mapfupa ake ose; Hakuna nerimwe rawo rinovhuniwa.

²¹Zvakaipa zvichauraya akaipa; Uye vanovenga vakarurama vachapiwa mhosva.

²²Jehovha anodzikinura mweya yavaranda vake; Hapana nomumwe kuna vanovimba naye achapiwa mhosva.