Read Shona Union Version 2002 Mapisarema 35 Bible Online

Mapisarema 35 - Shona Union Version 2002 bible

Mapisarema 35

¹Pisarema raDhavhidhi. Jehovha, kakavadzanai navanokakavadzana neni; Irwai navanorwa neni.

²Torai nhoo huru neduku, Musimuke kundibatsira.

³Vhomoraiwo pfumo, mudzivire nzira yavanonditeverera, Itiyi kumweya wangu, “Ndini muponesi wako.”

⁴Vanotsvaka mweya wangu ngavanyadziswe, vazvidzwe; Vanofunga kundiitira zvakaipa ngavadzoserwe shure vakanganiswe.

⁵Ngavafanane nehundi inopupuruswa nemhepo, Mutumwa waJehovha achivasundira.

⁶Nzira yavo ngaive nerima, itedze, Mutumwa waJehovha achivateverera.

⁷Nokuti ndisina mhosva vakandivanzira mimbure yavo muhunza, Ndisina mhosva vakacherera mweya wangu hunza.

⁸Kuparadzwa ngakumuwire akangofara; Uye mumbure wake waakavanza ngaumubate amene; Ngaawiremo aparadzwe.

⁹Mweya wangu uchafarira Jehovha Uchafarira kuponesa kwake.

¹⁰Mapfupa angu ose achati, “Jehovha ndianiko akafanana nemi, Imi munorwira murombo panaiye akamukurira nesimba, Iye murombo nomushaiwi panoanomupamba?”

¹¹Zvapupu zvisina kururama zvinosimuka; Zvinondibvunza zvinhu zvandisingazivi.

¹²Zvakanaka zvangu vanozvitsiva nezvakaipa, Vachibira mweya wangu.

¹³Asi kana ndirini, pakurwara kwavo ndakafuka masaga; Ndakatambudza mweya wangu ndichizvinyima zvokudya; Munyengetero wangu ukadzokera kuchipfuva changu.

¹⁴Ndakaita seyaiva shamwari yangu kana hama yangu; Ndakakotama ndichichema, somunhu anochema mai vake.

¹⁵Asi pakugumburwa kwangu vakafara, vakaungana pamwechete; Vanhu vakashata kwazvo vakaungana kuzorwa neni, navandakanga ndisingazivi; Vakandibvambura, vasingaregi;

¹⁶Savadadiri vakaipa pamitambo Vakandirumanyira meno avo.

¹⁷Jehovha, muchatarira izvozvo kusvikira riniko? Rwirai mweya wangu pakuparadza kwavo, Mudikanwa wangu pashumba.

¹⁸Ndichakuvongai paungano huru; Ndichakurumbidzai pakati pavanhu vazhinji.

¹⁹Vanondivenga ndisina mhosva ngavarege kufara pamusoro pangu; Uye vanondivenga ndisina mhosva ngavarege kubwaira neziso.

²⁰Nokuti havatauri rugare; Asi vanofungira avo vanyerere panyika mashoko okunyengera.

²¹Zvirokwazvo, vakandishamisira miromo yavo; Vakati, “Hekani, hekani! Meso edu akazviona.”

²²Makazviona, Jehovha; regai kunyarara; Ishe, regai kugara kure neni.

²³Zvimutsei, mukai mundiruramisire; Mutambe mhaka yangu, Mwari wangu naShe wangu.

²⁴Nditongerei, Jehovha Mwari wangu, nokururama kwenyu; Ngavarege kufara pamusoro pangu.

²⁵Ngavarege kuti mumwoyo mavo, “Hekani, ndizvo zvatanga tichida;” Ngavarege kuti, “Tamumedza.”

²⁶Ngavanyadziswe, vazvidzwe pamwechete, ivo vanofarira kutambudzika kwangu; Ngavafukidzwe nokunyara nokuzvidzwa, ivo vanozvikudza pamusoro pangu.

²⁷Ngavadanidzire nomufaro, vafare, ivo vanoda kururamiswa kwemhaka yangu; Ngavarambe vachiti, “Jehovha ngaakudzwe, Iye, anofarira kufara kwomuranda wake.”

²⁸Ipapo rurimi rwangu ruchataura zvokururama kwenyu, Nezvokurumbidzwa kwenyu zuva rose.