Read Shona Union Version 2002 Mapisarema 36 Bible Online

Mapisarema 36 - Shona Union Version 2002 bible

Mapisarema 36

¹Kumutungamiriri wokuimba. Pisarema raDhavhidhi muranda waJehovha. Kudarika kwoakaipa kunoreva mumwoyo mangu, kuchiti, “Hakuna kutya Mwari pamberi pameso ake.”

²Nokuti anozvibata kumeso kwake, Achiti zvakaipa zvake hazvingazikanwi zvikavengwa.

³Mashoko omuromo wake ndizvo zvakaipa nokunyengera; Akarega kuzova akachenjera nokuita zvakanaka.

⁴Anofunga zvakaipa panhoo dzake; Anofamba nenzira isina kunaka; Haasemi zvakaipa.

⁵Unyoro hwenyu, Jehovha, hwakasvika kudenga-denga; Kutendeka kwenyu kunosvikira kumakore;

⁶Kururama kwenyu kwakafanana namakomo aMwari; Kutonga kwenyu kwakadzika zvikuru; Jehovha, munochengeta vanhu nemhuka.

⁷Unyoro hwenyu, Mwari, hwakanaka-naka sei! Vana vavanhu vanondovanda pasi pomumvuri wamapapiro enyu.

⁸Vachagutswa kwazvo nezvakakora zveimba yenyu; Muchavanwisa parwizi rwezvinofadza zvenyu;

⁹Nokuti kwamuri ndiko kune tsime roupenyu; Muchiedza chenyu ndimo matinoona chiedza.

¹⁰Rambai muchiitira vanokuzivai unyoro hwenyu; Nokururama kwenyu kuna vamwoyo yakarurama.

¹¹Rutsoka rwoanozvikudza ngarurege kusvikira kwandiri, Ruoko rwoakaipa ngarurege kundidzinga.

¹²Apo ndopakawira pasi vaiti vezvakaipa, Vakawisirwa pasi, havangagoni kumukazve.