Read Shona Union Version 2002 Mapisarema 37 Bible Online

Mapisarema 37 - Shona Union Version 2002 bible

Mapisarema 37

¹Pisarema raDhavhidhi. Usava neshungu nokuda kwavanoita zvakaipa, Usagodora vanoita zvisina kururama.

²Nokuti vachakurumidza kudzurwa souswa, Vachaoma semuriwo mutema.

³Vimba naJehovha, uite zvakanaka; Gara panyika, ushingairire kutendeka.

⁴Farikana kwazvo kuna Jehovha; Iye agokupa zvinodikanwa nomwoyo wako.

⁵Isa nzira yako kuna Jehovha; Vimbawo naye, iye achazviita.

⁶Iye achabudisa kururama kwako sechiedza, Nokururamisirwa kwako samasikati.

⁷Nyarara pamberi paJehovha, umurindire unyerere; Usava neshungu pamusoro poanofara panzira yake, Pamusoro pomunhu anoita mano akaipa aakafunga.

⁸Rega kutsamwa, urashe hasha; Usava neshungu, zvinongotadzisa munhu.

⁹Nokuti vanoita zvakaipa vachagurwa; Asi vanorindira Jehovha vachagara nhaka yenyika.

¹⁰Kwasara chinguva chiduku, akaipa haachazovipo; Zvirokwazvo, iwe uchacherekedza zvakanaka paaigara, asi haachazovipo.

¹¹Asi vanyoro ndivo vachagara nhaka yenyika; Ndivo vachafarikana kwazvo norugare rukuru.

¹²Akaipa anofungira akarurama mano akaipa, Anomurumanyira meno ake.

¹³Ishe achamuseka; Nokuti anoona kuti zuva rake rinouya.

¹⁴Vakaipa vakavhomora munondo, vakawembura uta hwavo; Kuti vawisire pasi varombo navanoshaiwa, Kuti vauraya vakarurama panzira;

¹⁵Munondo wavo uchapinda pamwoyo yavo imene, Uye uta hwavo huchavhuniwa.

¹⁶Zvishoma, zvakanaka, zvowakarurama zvinopfuura Zvakawanda zvavakaipa vazhinji.

¹⁷Nokuti maoko avakaipa achavhuniwa; Asi Jehovha anotsigira vakarurama.

¹⁸Jehovha anoziva mazuva avane mwoyo yakarurama; Nhaka yavo ndeyokusingaperi.

¹⁹Havanganyadziswi nenguva yokuipa; Pamisi yenzara vachagutiswa.

²⁰Asi vakaipa vachaparara, Uye vavengi vaJehovha vachafanana nokunaka kwamafuro; Vacharova; vacharova soutsi.

²¹Akaipa anokwereta, asingaripizve; Asi akarurama ane ngoni, anopa.

²²Nokuti vanokomborerwa naye vachagara nhaka yenyika; Asi vanotukwa naye vachaparadzwa.

²³Mufambiro womunhu unosimbiswa naJehovha; Unofarikana munzira yake.

²⁴Kunyange akawa, haangawiswi chose; Nokuti Jehovha anomutsigira noruoko rwake.

²⁵Ndakanga ndiri muduku, zvino ndakwegura; Kunyange zvakadaro handina kutongoona akarurama achisiyiwa, Kana vana vake vachipemha zvokudya.

²⁶Zuva rose anoramba ane ngoni, achiposa; Vana vake vanokomborerwa.

²⁷Ibva pane zvakaipa, uite zvakanaka; Ugare zvakanaka nokusingaperi.

²⁸Nokuti Jehovha anoda zvakarurama, Haasiyi vatsvene vake; Vanochengetwa nokusingaperi; Asi vana vowakaipa vachaparadzwa.

²⁹Vakarurama vachagara nhaka yenyika, Vachagaramo nokusingaperi.

³⁰Muromo wowakarurama unotaura zvenjere, Rurimi rwake runotaura zvakarurama.

³¹Murayiro waMwari wake uri mumwoyo make; Pakutsika kwake haangatongotedzemuki.

³²Akaipa anovandira akarurama, Achitsvaka kumuuraya.

³³Jehovha haangamuregeri muruoko rwake, Kana kumupa mhosva kana atongwa.

³⁴Rindira Jehovha, urambire panzira yake, Iye achakukudza kuti ugare nhaka yenyika; Kana vakaipa vachiparadzwa iwe uchazviona.

³⁵Ndakaona akaipa anesimba guru, Achitandavara somuti munyoro panyika yawo.

³⁶Zvino mumwe akapfuurazve, wanei haachipo; Ndakamutsvaka, asi akanga asichawanikwi.

³⁷Cherekedzai munhu akakwana, mutarire akarurama; Nokuti kuguma kwomunhu uyo rugare.

³⁸Kana vari vadariki, vachaparadzwa pamwechete; Pakuguma kwavo vakaipa vachaparadzwa.

³⁹Asi kuponeswa kwavakarurama kunobva kuna Jehovha; Ndiye nhare yavo panguva yokutambudzika.

⁴⁰Jehovha anovabatsira, nokuvarwira; Anovarwira kuna vakaipa, nokuvaponesa, Nokuti vakandovanda maari.