Read Shona Union Version 2002 Mapisarema 39 Bible Online

Mapisarema 39 - Shona Union Version 2002 bible

Mapisarema 39

¹Kumutungamiriri wokuimba, kuna Jedhutuni. Pisarema raDhavhidhi. Ndakati, “Ndichachenjerera nzira dzangu, Kuti ndirege kutadza norurimi rwangu; Ndichachengeta muromo wangu netomu, Kana wakaipa ari pamberi pangu.”

²Ndakanga ndiri mbeveve ndisingatauri, Ndakanyarara hangu, ndiri kure nezvakanaka. Kuchema kwangu kukamutswa.

³Mwoyo wangu wakanga uchipisa mukati mangu; Ndakati ndichifunga, moto ukapfuta; Ipapo ndakataura norurimi rwangu, ndikati,

⁴“Jehovha, ndizivisei mugumo wangu, Uye mwero wamazuva angu, kuti akadini; Ndizivisei kuti ndinongopfuura hangu.”

⁵Tarirai, makaita mazuva angu sohupamhi hwechanza; Uye nguva yokurarama kwangu sechinhu chisipo pamberi penyu; Zvirokwazvo, munhu mumwe nomumwe kunyange akasimba kwazvo, mweya bedzi.

⁶Zvirokwazvo, munhu mumwe nomumwe anofamba-famba somumvuri; Zvirokwazvo, vanoita hope pasina; Anounganidza pfuma, asi haazivi kuti ndiani achaidya.

⁷Zvino Ishe, ndakarindireiko? Tariro yangu iri kwamuri.

⁸Ndirwirei pakudarika kwangu kwose; Regai kundiita munhu anosekwa namapenzi.

⁹Ndakanga ndiri mbeveve, handina kushamisa muromo wangu; Nokuti ndimi makazviita.

¹⁰Bvisai shamhu yenyu kwandiri; Ndapera nokurohwa noruoko rwenyu.

¹¹Kana muchiraira munhu muchimuranga pamusoro pezvakaipa, Munopedza kunaka kwake sechiunduzi; Zvirokwazvo munhu mumwe nomumwe mweya hake.

¹²Inzwai munyengetero wangu, Jehovha, rerekerai nzeve yenyu munzwe kuchema kwangu; Musanyarara muchiona misodzi yangu; Nokuti ndiri mweni kwamuri, Mutorwa, sezvakanga zvakaita madzibaba angu ose.

¹³Regai kunditarira, kuti ndimbonaya hangu, Ndisati ndabva pano, ndikasazovapo.