Read Shona Union Version 2002 Mapisarema 40 Bible Online

Mapisarema 40 - Shona Union Version 2002 bible

Mapisarema 40

¹Kumutungamiriri wokuimba. Pisarema raDhavhidhi. Ndakarindira-rindira Jehovha; Akarerekera kwandiri, akanzwa kuchema kwangu.

²Akandibudisawo pagomba rokuparadzwa, nomudziva ramatope; Akamisa tsoka dzangu padombo, akasimbisa kufamba kwangu.

³Akaisa rwiyo rutsva mumuromo mangu, rwokurumbidza Mwari wedu narwo; Vazhinji vachazviona, vachitya, Vachavimba naJehovha.

⁴Akakomborerwa anoita Jehovha chivando chake. Asina hanya navanozvikudza, navanotsaukira kunhema.

⁵Jehovha Mwari wangu, mabasa enyu, anoshamisa, amakaita, mazhinji, Nemifungo yenyu kwatiri; Hapana angaenzaniswa nemi. Kana ndikada kuzvidudzira nokuzvireva, Hazvingaverengwi nokuwanda kwazvo.

⁶Imi hamufadzwi nezvibayiro nezvipiriso; Makandidziurira nzeve dzangu; Zvipiriso zvinopiswa nezvezvivi hamuna kuzvireva.

⁷Ipapo ndakati, “Tarirai, ndauya; Parugwaro rwakapetwa ndakazvirairwa,

⁸Ndinofara kwazvo kuita kuda kwenyu, Mwari wangu; Zvirokwazvo murayiro wenyu uri mumwoyo mangu.”

⁹Ndakaparidza mashoko omufaro paungano huru; Tarirai, handingadzori miromo yangu, Jehovha, munozviziva.

¹⁰Handina kuvanza kururama kwenyu mumwoyo mangu; Ndakadudzira kutendeka kwenyu nokuponesa kwenyu; Handina kuvanzira ungano huru unyoro hwenyu nezvokwadi yenyu.

¹¹Jehovha, imi hamungandinyimi ngoni dzenyu; Unyoro hwenyu nezvokwadi yenyu zvichandichengeta nguva dzose.

¹²Nokuti madambudzo asingaverengwi akandikomberedza, Zvakaipa zvangu zvakandibata, naizvozvo handigoni kutarira kumusoro; Zvakawanda kupfuura vhudzi romusoro wangu, ndapera mwoyo.

¹³Jehovha, ngazvikufadzei kundirwira; Kurumidzai kundibatsira, Jehovha.

¹⁴Ngavanyadziswe, ngavazvidzwe pamwechete. Ivo vanotsvaka mweya wangu kuti vauparadze; Ngavadzoserwe shure, vashorwe Ivo vanofarira kundikuvadza.

¹⁵Ngavavhunduswe nokuda kwenyadzi dzavo Ivo vanoti kwandiri, “Hekani, hekani waro!”

¹⁶Vose vanokutsvakai ngavafarise vave nomufaro mamuri; Vanoda kuponesa kwenyu ngavarambe vachiti, “Jehovha ngaakudzwe!”

¹⁷Asi ini ndiri murombo nomushaiwi; Kunyange zvakadaro Ishe anondifunga; Imi muri mubatsiri wangu nomurwiri wangu; Regai kunonoka, Mwari wangu.