Read Shona Union Version 2002 Mapisarema 42 Bible Online

Mapisarema 42 - Shona Union Version 2002 bible

Mapisarema 42

¹Kumutungamiriri wokuimba; rwiyo rweMashiri rwavanakomana vaKora. Senondo inotakwairira hova dzemvura, Saizvozvo mweya wangu unokutakwairirai imi Mwari.

²Mweya wangu une nyota kuna Mwari, iye Mwari mupenyu, Ndichasvika riniko ndionekwe naMwari?

³Misodzi yangu zvakanga zviri zvokudya zvangu masikati nousiku, Pakutaura kwavo zuva rose kwandiri vachiti, “Mwari wako aripiko?”

⁴Ndinorangarira zvinhu izvi, ndichidurura mweya wangu mukati mangu, Zvokuti ndaienda navazhinji, ndichivatungamirira kuimba yaMwari Nezwi rokufara nokurumbidza, tiri vazhinji vaitamba mutambo.

⁵Unoshuwireiko, mweya wangu? Unoshaiwa rugare neiko mukati mangu? Tarira kuna Mwari; nokuti ndichazomurumbidza hangu, Nokuda kwokuponesa kwechiso chake.

⁶Haiwa Mwari, mweya wangu unoshuwa mukati mangu; Naizvozvo ndinokurangarirai ndiri panyika yaJorodhani, Napamakomo eHerimoni, nechikomo cheMizari.

⁷Pakadzika panodana pakadzika pakutinhira kwamapopopo enyu; Mafungu enyu namapoporodzi enyu akapfuura napamusoro pangu.

⁸Asi Jehovha acharaira unyoro hwake panguva yamasikati, Usiku rwiyo rwake ruchava neni, Uye munyengetero kuna Mwari woupenyu hwangu.

⁹Ndichati kuna Mwari, dombo rangu, “Makandikanganwireiko? Ndinofambireiko ndichichema nemhaka yokumanikidza kwomuvengi wangu?”

¹⁰Zvakafanana nomunondo pamapfupa angu, kana vadzivisi vangu vachindizvidza; Kana vachiramba vachiti kwandiri, “Mwari wako aripiko?”

¹¹Unoshuwireiko, mweya wangu? Unoshaiwa rugare neiko mukati mangu? Tarira kuna Mwari; nokuti ndichazomurumbidza hangu, Iye muponesi wechiso changu, naMwari wangu.